E aña akí e tópiko pa e Premio “Cola Debrot” ta riba e área di Siensia. Gobièrnu di Kòrsou a hasi entrega di premio Cola Debrot na Dòkter Isaac “Izzy” Gerstenbluth. E entrega a keda hasí pa Promé Minister sr. Gilmas Pisas i Minister di Enseñansa, Siensia, Kultura & Deporte (ESKD) sr. Sithree van Heydoorn. Durante di un bunita anochi Dr. Isaac (Izzy) Gerstenbluth a risibí e premio den kompania di famia i konosínan na Museo Kòrsou. Premio Cola Debrot ta konsistí di un boton di oro representando e flor di larahá, un sertifikado i un montante simbóliko.
Premio Cola Debrot ta un premio riba tereno kultural ku a keda introdusí for di 1968 i anualmente Gobièrnu di Kòrsou ta otorgá e premio na un persona òf organisashon ku a hasi trabounan meritorio riba e tema ku ta na turno; e aña akí e tema ta Siensia. Ta bon pa menshoná ku na tur tin 8 kategoria, ku ta Arkitektura, Arte Visual, Baile, Folklor, Literatura, Músika, Teatro i Siensia. E entrega di Premio Cola Debrot ta tuma lugá riba e fecha natalisio di Nicolaas “Cola” Debrot (4 mei 1902 – 3 desèmber 1981). Nicolaas “Cola” Debrot tabata un hurista, eskritor i polítiko, pues un persona multifasétiko. Cola Debrot a nase na Boneiru riba 4 mei 1902. Komo Minister Plenipotensiario di Antia Hulandes na aña 1952, su persona a hunga un ròl importante den e relashonnan entre e islanan di Antia Hulandes. Tambe e tabata Gobernador di Antia Hulandes for di 1962 te ku 1970. Riba 3 desèmber 1981 Cola Debrot a fayesé na Hulanda.
Ku masha orguyo Gobièrnu di Kòrsou ta otorgá e Premio Cola Debrot di 2022 na sr. Isaac “Izzy” Gerstenbluth pa su esfuersonan grandi brindá riba tereno di Siensia. E proposishon a keda hasí pa Konseho Kultural Kòrsou ku tur aña di nobo ta instituí un komishon independiente pa skohe e ganadó di e prestigioso premio akí. E aña akí Konseho Kultural Kòrsou a presentá sr. Isaac “Izzy” Gerstenbluth komo nominado pa risibí e premio. Konseho di Minister a ratifiká e proposishon akí i Minister di ESKD sr. Sithree van Heydoorn a invitá e nominado na un reunion pa puntra Dòkter Izzy si e ta aseptá e premio. Dòkter Izzy a reakshoná sorprendí i a ekspresá di a keda sumamente babuká ku e notisia.
Sr. Isaac “Izzy” Gerstenbluth a produsí diferente publikashon sientífiko den diferente revista, esakinan revisá pa homólogonan (personanan ku ta ehersé mes un tarea ku sr. Izzy Gerstenbluth na ingles, “peer-reviewed”). Su enfoke sientífiko prinsipal ta temanan ku ta trata e siensia di salubridat públiko i ta relatá na temanan ku tin mashá relevansia pa nos komunidat lokal. Manera malesanan di infekshon i tambe kondishonnan króniko manera entre otro enfermedat kardiako/kardiovaskular i diabetis. E publikashonnan i e datonan generá pa medio di esaki tabatin impákto riba e maneho ku e sektor di salubridat a hiba na Kòrsou i tambe den region.
Ban sigui kere i apoyá nos mes hendenan i sigui duna nan e balor ku nan meresé, di e forma akí nan por ta modelo pa nos yunan ku ta kresiendo.
Un danki na Konseho Kultural Kòrsou pa nan trabou estupendo!
