Na final di decada 90 partido MEP a manda su simpatisantenan core un campaña di difamacion contra partido AVP. E difamacion tabata encera cu partido AVP tabata un partido di maco. Esunnan cu no tabata di acuerdo cu e forma aki di hiba campaña a bandona fila di MEP. Locual cu partido MEP a sembra e tempo ey awe e partido ta cosecha.
Na 2016 tabata partido MEP cu a saca e concepto di ley pa matrimonio di mesun sexo for di prullebak y presente como amienda 7. E partidonan MEP, AVP y PDR a vota na fabor y asina a aproba e amienda 7. Den AVP tabata tin cuater parlamentario cu a vota contra e amienda 7, pero no tabata suficiente pa no a pasa e ley.
Na september 2017 tabata tin eleccion y a bin cambio den gobierno. Partido AVP cu un partido di diestres asiento a cay na nuebe asiento. E partidonan MEP, POR y RED a forma gobierno. Dia prome di maart 2021 parlamento a trata e codigo civil unda e geregistreerd partnerschap ta regla y diesshete parlamentario di e partidonan MEP, RED, POR y AVP a vota na fabor y solamente cuater parlamentario a vota contra. E parlamentarionan Tevreden y Guedez cu ta forma parti di partido MEP den gobierno a vota contra, pero no a kita nan sosten for di partido MEP. Si nan a haci esey, gobierno lo a cay y e ley lo no a pasa. Candelaria y Sneek di partido AVP a vota contra y awe ningun di dos ta den parlamento.
Partido Curpa a participa na 2017 na eleccion y a spierta pueblo kico ta spera e pueblo di Aruba si tanto partido MEP of parti AVP drenta gobierno. Tur dos partido ta pusha e metanan di desaroyo sostenibel agenda 2030. Nos mester sigui recorda pueblo cu partido Curpa ta e unico partido cu ta para pa e famia. E pastoornan Cristian a dividi nan miembronan di iglesia na 2017 y na 2021 pa vota pa partido MEP y partido AVP. E pastoornan aki a pone partido Curpa riba e lista cu no mag di haya e voto cristian. Partido Curpa a sa di mantene e principionan di Dios na halto. Tur locual partido Curpa a spierta pueblo di Aruba awe ta birando realidad.
Locual cu a pasa diaranson 8 di februari 2023 cu bishita di e famoso crucero, a laga henter nos pueblo den shock. Pasobra nan no por kere cu locual nan a mira cu nan propio wowonan. Dia 8 di februari 2023 e linea di internet tabata hopi cayente pa tur e potret- y videonan di pornografia cu a bay rond. Nos ta kere cu gobierno ta hunga cu nos unico pilar economico, pasobra hopi turista lo no bin un isla cu ta promove inmoralidad y sigur no ta sano pa nan yiunan. Kisas esaki ta e plan cu gobierno ta sigui di WEF pa caba cu economia di Aruba.
Kier cuestiona nos Cuerpo Policial di no sa di haci su trabao manera debe ser. E prome instancia cu mester wordo cuestiona ta gobierno cu ta permiti un cos asina tuma luga. Nada no ta pasa por nada y locual cu a tuma luga ta pa pueblo di Aruba habri nan wowo hancho y mira kico ta spera nos pueblo na man di e gobierno aki cu sosten di parlamentarionan Tevreden, Berlis y Guedez cu no tin e curashi pa pone un fin na actonan inmoral asina. Esaki tabata e antesala y e situacion lo bira hopi mas pio paso esaki ta e estilo di bida cu gobierno kier pa nos pueblo custuma cu ne. E bala ta den scochi di pueblo pa dicidi si lo pone un fin na un manera di biba asina. E unico partido cu a keda cu por trece un cambio ta partido Curpa. Nos ta kere cu pueblo ta hopi decepciona cu e gobierno aki. Dios a permiti henter nos pueblo biba un experiencia asina pa mira e realidad kico lo pasa si no bin un cambio den gobernacion. E huicio di Dios ta na porta y tur cos ta den man di pueblo.
