Hopi hende ta puntra kico ta haci coronavirus diferente cu otro virusnan. Maribelle Tromp LabConsultant, a splica cu e diferencia ta keda cu e virus ta uno nobo y e hecho cu no tin ningun inmunidad pa e virus aki.
Cu esaki Tromp kiermen cu nunca ningun hende no a crea inmunidad pa e malesa aki. Esey ta haci cu e impacto cu e ta bay bin cun’e y e impacto cu cual e ta bay dal e poblacion na e momento aki, ta haci’e asina particular y asina dañino tambe na mes momento.
E rapidez cu e ta bay cun’e y e atake cu e ta ataca e poblacion, ta haci’e asina particular cu actualmente henter mundo ta trahando riba nan plan, pero tambe nan ta monitor di cerca con e ta mobilisa su mes den e pueblonan rond mundo.
Pasado
Den e tempo di Swine Flu, manera di tin di compronde di estudionan cu a wordo haci, e DNA di e virus a cambia na caminda. Na momento cu tabata tin asina hopi contacto entre e bestia cu e hende, e contacto ey a keda hopi frecuente, ta haci cu e virus por modifica su mes pa e por sobrevivi.
Loke ta pasa ta cu el a modifica su mes, uzando informacionnan di otro bestia y kisas di hende mes, cu e por a modifica su mes cu e lo infecta hende. E informacion ey no tabata tin na momento cu e tabata den e bestia ta circula. E ta haya e informacion cu e por infecta hende y haci’e malo.
El a pasa den Swine Flu y Avian Flu. E ultimo aki tabata uno cu a modifica su mes bay hende. For di Avian Flu a wak cu el a cambia den H1N1, cual tabata un otro combinacion di DNA, pero e mesun influenza. Pero door cu no tabata tin inmunimdad p’e, ta haci’e asina fastioso.
Personanan di edad
Segun Tromp, e ta un malesa cu ta ataca e pulmon. Hendenan grandi ta swak pa e banda ey. Hendenan grandi ta bira un tiki mas vulnerabel pa tur malesa riba su mes. E fastioso di esaki ta cu no tin remedi p’e tampoco. Nan ta trata sintoma. Na e momentonan aki, nos hendenan grandi, pero hendenan cu tin problema cu nan inmunidad, manera esnan cu tin cancer, HIV, alergie y COPD tambe, ta haci nan personanan cu ta vulnerabel pa e malesa aki.
Si bo tin un mucha cu ta sufri di un malesa di pulmon, y e haya e malesa aki, e por ta fatal p’e, pasobran e por dal’e mas duro. Tin caso, no hopi, pero ta keda haya casonan toch den edad hoben cu tabata fatal. Tin cu a recupera pero tabata fatal tambe. Nos no mester subestima e potencial di e virus aki pa haci bo malo y cu consecuencianan fatal.
Loke expertonan di e ramo a constata tambe ta cu riba materialnan di stainless steel y plastic e virus ta keda te cu 72 ora bibo. Esaki a bini ora cu e informacion cu tabatin disponibel ta cu e por keda maximalmente 24 ora bibo. A haci investigacion riba diferente tipo di material y a constata cu riba plastic y hero e ta keda mas tempo na bida. Esaki, segun Maribelle Tromp, ta nifica cu mester haci e superficienan limpi den un forma mas frecuente. Pues diferente biaha pasobra e informacion ta bisa cu e virus por keda bibo 72 ora. P’esey telefonnan ta un di e aparatonan, ademas di mannan, mester wordo haci limpi den forma frecuente.
Paisnan grandi y chikito por siña hopi di e situacion na entre otro China, Italia, Hulanda y Merca. Pero mester ta consciente tambe cu cada pais ta aplica loke ta den nan man y ta posibel. Hopi pais ta aplica e formula di “flatten the curve”, aplicando cierto medidanan y e cantidad di hendenan cu ta bira malo lo ta menos pero plamando esaki riba un periodo mas largo. Di e forma aki e ta un poco mas controla. Y China a bay den extremo. Por siña hopi di nan strategia, pero adapta na e situacion local.
Hulanda ta siguiendo e modelo Mericano. E costo di esaki den Salud Publico ta hopi halto, basta morto lo bay cay. Mester scoge cual strategia ta bay uza basa riba e resultado cu kier mira. Ningun strategia ta malo pero un mester wordo scogi pa atende cu e crisis. E ta na fabor pa uza un strategia unda cu tin menos morto.
Sra. Tromp ta kere cu e “timeline” di presencia di e virus na Aruba lo ta mescos cu otro paisnan, e lo keda circula. A cera su entrada y awo mester controla kende ta esnan cu a drenta prome cu e crisis.
Su conseho ta pa sigui medida y instruccionnan duna. Esaki ta nifica distanciamento social y laba man hopi bon.
