Home » Entrante december: Doño di trabou ehemplar por trece un trahado di afo pa seis luna

Entrante december: Doño di trabou ehemplar por trece un trahado di afo pa seis luna

by Alexandra

Minister encarga cu Asuntonan di Stranheria, mr. drs. Arthur Dowers, a anuncia cu entrante prome di december lo introduci un permiso nobo di seis luna pa yuda dunado di trabou atende cu necesidad di personal y alivia e presion riba e mercado laboral. Segun e mandatario, e medida aki ta destina pa trahadonan cu ta bin di pafo di Aruba y tin como meta facilita e proceso di admision mientras e temporada halto di turismo ta yega.

Durante su declaracion, Dowers a splica cu ta trata di un instrumento cu ta duna dunado di trabou e posibilidad di trece personal pa un periodo di seis luna, diferente for di e permisonan existente di tres te cu diesun luna pa proyectonan specifico. E minister a subraya cu e persona mester bin di exterior y no por ta caba na Aruba cu intencion di djis sali for di e pais pa bay aplica pa e permiso aki.

Condicionnan principal y proceso di aplicacion

Pa por haci uzo di e permiso nobo di seis luna, mester tene cuenta cu varios condicion y regla:

  • Rekisito pa dunado di trabou: E dunado di trabou mester tin su asuntonan regla tanto cerca belasting como cerca SVB.
  • Seguro y conducta: E dunado di trabou mester provee un seguro pa e trahado, mientras cu e solicitante mester cumpli cu e rekisitonan regular, manera entrega un declaracion di bon conducta.
  • Salida despues di seis luna: Despues cu e periodo di seis luna termina, e trahado mester bandona Aruba; e por re-aplica of drenta un otro trayecto despues, pero for di exterior.
  • Fecha di inicio: Aplicacionnan lo cuminsa wordo atendi entrante prome di december, y dunadonan di trabou por prepara nan documentacion adelanta sin entrega prome cu e fecha ey.

Tramitacion mas lihe cu documentacion completo

Dowers a indica cu e intencion ta pa haci e tramite menos pisa den e casonan aki, cu meta pa saca e permisonan dentro di dos siman si tur documento ta na ordo. Sinembargo, el a adverti cu retraso por surgi si e peticion wordo entrega incompleto, por ehempel sin e papel di bon conducta, recordando solicitantenan pa no culpa DIMAS ora documentacion falta.

Sectornan cu mas demanda

Segun e evaluacion haci den e periodo recien, e mandatario a señala cu e presion mas grandi riba e mercado laboral ta concentra den cierto ramo economico. El a menciona e sector horeca – incluyendo limpiesa den hotelnan y personal di restaurant manera waiters y bartenders – como tambe construccion, cierto servicionan y e sector di wellness y gimnasio.

Dowers a agrega cu Ministerio di Labor lo dedica mas atencion na e areanan aki y lo anuncia den e periodo nos dilanti cua categorianan lo drenta den e trayecto normal. Mientras tanto, el a pidi cooperacion di tanto dunadonan di trabou como trahadonan pa e permiso di seis luna funciona manera planea.

Bo por gusta tambe

Adblock Detected

Please support us by disabling your AdBlocker extension from your browsers for our website.