Diabierna dia 2 di februari 2024, miembronan di e ekipo di Embassy Suites Aruba a celebra nan prome aniversario di un forma grandioso. E hotel a ricibi su prome huesped riba dia 3 di februari 2023 y un dia prome a celebra e momento special aki cu un Team Member Rally.
Durante su prome aña e hotel tabatin varios logro importante, di cual e prome tabata na luna di mei cu oficialmente Embassy Suites by Hilton Aruba Resort a wordo reconoci y certifica pa un periodo di un aña como un “Great Place to Work”. A haci un encuensta bou e miembronan di ekipo, unda nan por a yena nan satisfaccion trahando na e hotel. E resultado tabata masha positivo. E comentarionan ricibi a demostra cu e miembronan di ekipo ta hopi contento y satisfecho cu e trato na pia di trabou.
E logro aki nan a celebra cu e tema di neon, unda e miembronan di ekipo a gosa bailando y disfrutando den un ambiente festivo y colorido. Den e luna di november, e marca Hilton a gana e titulo di “Best place to work” rond mundo, indicando cu e marca aki ta e miho compania pa traha compara cu e otro marcanan grandi rond mundo.
Como parti di e celebracion di e prome aniversario di Embassy Suites Aruba, a skirbi e frase “One Year Anniversary” riba un muraya, unda tur e miembronan di ekipo por a pone nan plant’i man cu verf di diferente color. E idea tabata pa yena e muraya cu mas tanto plant’i man cu ta posibel pa asina celebra y recorda e aniversario den un manera dibertido, unda tur e miembronan di ekipo por tabata parti di e celebracion como un gran famia.
A brinda un treat hopi special riba e dia aki cu dushi snacks, manera pastechi, lumpia, kroket, sweet box, bolo, cuki personalisa, koffie, te y diferente sabor di juice. E miembronan di ekipo tabata emociona y contento celebrando e prome aniversario di Embassy Suites Aruba den un ambiente festivo cu musica y alegria.
