Oranjestad – 9 di februari 2024: A celebra un anochi magnifico na Embassy Suites Aruba, den cual a reconoce y duna elogio na e miembronan di ekipo cu e prome “Team Member/Supervisor of the Year Award Night” riba dia 31 di januari ultimo. E gerente general di Embassy Suites Aruba, Pablo Casal y director di recurso humano, Angelique Croes a gradici y yama danki na e miembronan di ekipo pa nan trabou excepcional. E tabata un momento special pa reconoce tur e 19 miembronan di ekipo nomina pa nan servicio sobresaliente durante henter aña 2023.
E maestronan di ceremonia pa e anochi aki tabata Pablo Casal, Angelique Croes y Zia Habibe. Durante e ceremonia, Angelique y Zia, cu ta fungi como coordinador di recurso humano, a dedica un discurso personalisa mencionando caracteristicanan special cu ta distingui e 19 nominadonan y compartiendo algun anectoda dibertido di cada un.
E nominadonan a ser acompaña pa un miembro di nan famia, cu tambe a ricibi bunita palabranan di agradicimento pa e sosten brinda na nan ser keri durante henter aña.
Despues di hopi anticipacion a revela e ganadonan na final di e anochi, cu a resulta den persona di Janice Cater y Rosalyn Flanegin. Janice Cater – F&B Waitress ta e ganado di “Team Member of the Year 2023”. Janice tabata entre e prome personanan cu a asisti na e Job Fair organisa pa Embassy Suites na november 2022. Desde e dia ey tabata imposibel pa lubida Janice.
Janice ta un persona hopi alegre y positivo, cu ta transmiti hospitalidad. Ora el a bin forma parti di e ekipo di e hotel, el a mustra su disponibilidad na cualkier momento pa duna un servicio excepcional. Unda cu Janice ta, esnan rond di dje ta sinti su energia positivo y encanto.
Rosalyn Flanegin – Housekeeping – Housekeeping Supervisor ta ganado di “Supervisor of the Year 2023”. Rosalyn ta demostra cu e tin e capacidad di ehecuta su trabou cu amor y dedicacion. E tin un excelente relacion cu su ekipo y ta sigura cu e departamento ta funciona sin problema.
Rosalyn ta hopi harmonisa cu su ekipo y ta mir’e como un persona di confiansa cu por acudi pa pidi conseho. E ta tambe un persona hopi chistoso y ta diberti cu tur hende siendo semper respetuoso.
E ganadonan a ricibi, ademas di nan award como “Team Member y Supervisor di Aña”, diferente otro premio y entre cual un bunita bouquet di flor. Tur 19 nominado incluyendo e ganadonan a haya un regalo personalisa. E miembronan di ekipo a sinti nan mes masha special durante e evento aki, unda nan por a comparti den un ambiente di cordialidad cu nan colega y famia.
E miembronan di famia presente a haya e oportunidad tambe pa conoce e hotel y disfruta di un bunita evento, cu un cena exkisito cu a ser deleita cu e presentacion di un guitarista y cantante pa haci e prome “Team Member / Supervisor of the Year Award Night” un evento memorabel.
