E fin di siman cu a pasa tabata yena cu lamper y strena y esaki a causa cu varios caminda tabata sin coriente. Robert Henriquez, director di Elmar, ta conta cu e ta hopi gradicido na e trahadonan di Elmar cu a sali den e tempo, bao di condicionnan hopi fastioso pa eherce nan trabao durante lamper y awa cu a cay masha duro mes diasabra anochi maneciendo diadomingo mainta. E ta un trabao hopi esplendido cu nan a haci durante e marduga eynan. Segun Henriquez, tin biaha no ta para keto realisa con e situacion di condicion pa traha na e momento ey y si dado caso coriente bay, e ta algo di tene un tiki pasenshi, pasobra e tecniconan ta riba caminda. No ta laga nan subi den palo of den baki pa yega na un fuse ora cu lamper ta cay. Ta bisa nan pa ta masha cauteloso mes, na e momento bao di e circunstancia y condicionnan ey, pero esey no ta kita afo cu nan ta sali. Tur coriente lo wordo restaura, pero pa tene tiki pasenshi pasobra e personanan aki ta hopi bon mes den nan trabao. Tambe siguridad di nan ta na prome luga, sigur pa Elmar.
En berdad cu diasabra anochi awa a cuminsa yobe y un di e prome luganan cu a perde coriente lastimamente ta San Nicolas. Eynan lampernan a cuminsa cay y manera lamper cay riba nan hoogspanningsnet, fusenan ta bula, pa asina proteha e ekiponan. Tin biaha no ta para keto cu e cantidad di energia cu lamper ta descarga ora di touch tera, cual ta enorme. Tin biaha nos ta lubida con e situacion ta y sigur e fusenan di e hoogspanningnan cu ta bula, ta pa proteha ekiponan di Elmar. Asina mes ta perde ekipo, pasobra hopi biaha e luz of e velocidad cu e lamper ta pasa door di dje, no ta suficiente tempo pa e fuse bula na tempo, pa asina proteha e ekiponan. Por remarca cu a perde por lo menos 4 transformer di Hoogspanning. Cada transformer ta core den sigur un 40 pa 45 mil florin. A puntra tambe cuanto fuse a cambia durante e diasabra anochi, pa diadomingo mainta y henter diadomingo toch aki aya a keda cambia fuse cu a keda atras. A cambia mas of menos un 120 fuse. E trabao haci pa e personanan aki ta super sublime, segun e director. E ta sigur e ta di aprecia con e personanan aki ta pone coriente bek.
E trabaonan tabata hopi. Condicionnan di trabao, core riba caminda, awa ta yobe, no tin visibilidad . Tin cu warda lamper stop di cay, pa asina por subi den e truck y cambia fuse. Ta cos di curason cu ta aprecia di e trahadonan aki.
