Con sano nos fondo di pensioen ta. Esey ta un pregunta cu a haci director di SVb, Edwin Jacobs. Riba esaki el a comenta cu nan a duna un indicacion con e desaroyo ta bayendo den e fondonan.
Tabata tin un informacion cu no a wordo completamente bon interpreta. Tabata e situacion di e fondo di pensioen di biehes.
Manera ta conoci, e fondo di biehes, na comienso di e decada aki, tabata den un situacion hopi precario. Despues a bin e reformanan y desde 2014 p’adilanti e fondo aki, cual ta un fondo hopi importante pa nos grandinan, a drenta den e fase di recuperacion. Tur aña awor aki, e economia mester draai pa duna e extra cu SVb ta pone den e reserva pa e fondo por sigui crece. E reserva di e fondo ta hopi importante pa por atende e grupo grandi di pensionado, cu ta bay ta drentando e fondo despues di aña 2025. E momento aki e strategia cu a wordo usa pa e reforma ta, cu den e añanan aki, te cu 2025 tin cu crea reserva. Tur aña bo mester tin surplus riba e aña ey, esta bo primanan mester ta mas hopi cu bo gastonan. Esey ta pon’e riba bo reserva pa bo bay p’adilanti. A indica cu na e momento aki e reserva ta entre 1 y 2 luna. No ta nifica si cu esey tin pa paga. Tur luna ta ricibi for di belasting locual nan colecta na impuesto. Ora cu kita for di dje loke ta paga, loke resta ey ta manda riba e reserva. Esey ta sosodiendo tur luna desde 2014 bin p’adilanti.
Ta constata si cu tin un situacion cu ta preocupa SVb, pa motibo cu locual ta mira den cifra di SVb cu e cantidad di trahadonan sigura cerca nan ta aumentando. Na Departamento di Impuesto, e dunado di trabao ta pagando prima, pero e prima ta bahando. Eynan tin algo cu no ta cuadra y esey a bisa cu ta bay sinta un rato cu Departamento di Impuesto pa wak kico e ta. Si cantidad di trahado ta aumenta, bo prima di AOV ta suppose di sigui’e tambe den aumento. E dunado di trabao lo no ta cumpliendo completamente cu nan obligacion cu nan tin di paga prima.
Consecuentemente si e prima ta core atras, ta nifica cu locual bo por tira riba bo reserva tambe ta bira menos. Esey ta un situacion cu ta bisa cu no ta locual SVb ta mira cu tin cu sosode. Pero cu e fondo di AOV lo ta den peliger, no. No ta asina, segun Jacobs.
E fondo ta bin den recuperacion si. Recuperacion ta nifica cu e no ta full sano ainda. Pero e ta bayendo poco poco birando miho. Esey ta e situacion di e fondo di pensioen di biehes na e momentonan aki.
Awor, na e momento aki, e ta entre 1 y 2 luna di reserva. Anteriormente e tabata menos cu 1 luna di reserva. Aki 6 luna ta spera cu e por pasa e 2 luna. Aki 4 aña, e mester tin 4 luna y ta spera cu por yega na 1 aña di reserva di e gastonan di e fondo, pa tin esey na reserva. E reseva ta wordo usa mas tanto ora cu economia cay cu e primanan ta baha, bo tin e reserva pa yuda y tambe ta premira ora cu e grupo grandi di pensionado cuminsa drenta bek na 2024 p’adilanti, na momento cu e edad di pensioen stabilisa na 65 aña.
Importante ta tambe pa por menciona, cu ningun momento e fondo di AOV si pasa algo mes, no por keda sin paga su pensioennan. Pasobra e pensioennan aki ta garantisa pa ley door di gobierno. Cualkier momento cu e fondo no tin suficiente entrada, gobierno tin e obligacion di duna un contribucion pa paga esaki. Ta bon pa trece p’adilanti pa asina trece e trankilidad cerca e pensionadonan un interpretacion diferente cu e expresionnan por a causa tiki panico, pero Jacobs ta garantisa cu nan ta riba bon caminda.
Na momento cu a entrega e cuentanan anual di 2017, e fondo aki a conoce un surplus, esey ta keda bay riba reserva. Si tin un asunto cu pa SVb, kier atende, cu ta e hecho cu ta mira cerca nan un desaroyo, cu ta e crecemento di trahadonan y na impuesto, e doño di trabao cu ta pagando menos. Ey tin algo cu tin cu bay atende cun’e, pasobra ta nifica cu e dunado di trabaonan no ta pagando locual nan mester contribui na prima di AOV pa e fondo, segun Jacobs.
Deficit
Desde 2006 y 2007 p’adilanti, e fondo a cuminsa conoce deficit anual. E prima cu tabata tin, no tabata yega pa paga e pensioen. E momento ey e fondo tabata tin un reserva di casi 200 miyon florin. A cuminsa come den dje. A cuminsa come rapidamente, segun Jacobs. A premira cu pa 2013/2014 e reserva lo a caba. A avisa Gobierno cu suficiente anticipacion y ora a tuma e medidanan pa evita esey. A yega si na aña 2013/2014, e momento di mas abao di e reserva cu e fondo tabata tin. Tabata tin inversionnan cu mester a bende. El a bende nan cu e fondo di cesantia pa haya e placa pa por a paga pensioen. E reserva ta hunga un rol importante den plan di recuperacion cu tin cu keda aumenta e reserva ey pa temponan di berans. Cosnan draai bon, por mira den SVb cantidad di trahado ta sigura, ta aumenta, ta nifica cu e economia ta lorando. Kisas no manera cu tabata desea, pero e ta lorando. Tin cu mir’e bek tambe den e prima cu SVb no ta cobra. E prima di pensioen di biehes, SVb no ta cobr’e. Esey ta wordo cobra pa DIMP. Si e dos datonan ey, si un ta crece e otro no ta crece, ta nifica cu tin un caminda cu un hende no ta cumpliendo cu su obligacion.
