Pa mas cu 26 aña caba na varios ocasion special, Edjean Semeleer a bishita diferente cas di cuido rond di Aruba pa asina presenta su musica y alegra e habitantenan di e casnan aki.
E december aki no tabata diferente, apesar di e situacion sin precedente cu mundo ta haya su mes aden, e cantante local a presenta un concierto di Pasco na nos grandinan cu ta biba den e casnan aki. Despues di 9 luna sin ningun actividad special, porfin e grandinan por a disfruta atrobe di un rato alegre y cu bon musica.
Edjean ta e unico artista cu por a logra haci esaki, despues di a tuma precaucionnan estricto y necesario hunto cu e staff y personal di nos casnan di cuido pa cu e siguridad y salud di e habitantenan.
Habitantenan di entre otro Paviljoen Azalia, SABA centro di cuido San Nicolas, Mari Stella y Paviljoen Orquidea a canta y disfruta inmensamente di e rato aki.
E habitantenan a expresa nan deseo ferviente pa pronto e situacion dificil cu nos ta pasando aden por ta tras di lomba, ya asina nan por ricibi un brasa for di nan sernan keri y sigui disfruta di actividadnan special manera esaki.
No solamente e grandinan a keda sumamente emociona, contento y agradecido, pero staff y personal di e casnan di cuido aki tambe a expresa nan gratitud inmenso na Edjean pa por a regala e presentacionnan musical aki pa alegra e curasonnan di grandinan.
Asina pues nos por mira cu apesar di e situacion dificil cu mundo ta haya su mes aden, asina mes tin cosnan hopi positivo y admirabel sosodiendo.
Ta inspirativo y motivante pa mira hendenan cu ta dedica nan tempo na duna atencion y cariño na por ehempel grandinan, cu hopi bes ta sinti nan mes lubida. Un gesto cu sigur ta di aplaudi.
