Stephen Wilson durante tratamento di e caso penal contra dje pa stuur malo y causa un accidente fatal, ademas di a maneha auto sin rijbewijs. E acusado ta admiti e ultimo, pero ta nenga di tabata stuur malo of cu e no tabata apto pa maneha auto.
Den presencia di familiar y amistad di ambos banda, hues a trata e caso, mustrando hopi comprension pa famia y a splica nan cu lo por tin cosnan cu ta bin dilanti cu ta doloroso. Inclusive ora cu e acusado of su abogado papia, pa cual e ta pidi nan hopi calma y nan por sali y bolbe drenta si sinti cu nan emocion ta domina.
E accidente aki a sosode dia 2 di october 2022, cu a causa morto di un menor, su mama y su tanta. Famia Wouters a perde tres familiar den un solo tiro ora cu e auto di e acusado a dal frontal den esun di e rumannan. Den e caso aki ta draai si e chauffeur a stuur malo y si e tabata den condicion di maneha door cu el a bebe algun ora prome. “Si mi a sinti cu mi no tabata bon, mi lo no a subi e auto ni pa hiba mi yiunan cerca nan mama”, Stephen Wilson a comenta.
E acusado a admiti cu diasabra anochi e tabata na Batata Beach unda cu el a keda te rond di 3:00 am. El a bebe 4 pa 5 mixed drinks ( Hennessy). El a subi su cama pa 4:00 am y a lanta 8:00 am pa hiba su yiunan cerca nan mama. Prome cu el a sali, el a baña, traha cos di come pa e muchanan. E no tabatin gana di bay traha y a sinti cu algo ta bis’e no bay. Sinembargo el a dicidi di avisa cu e lo yega un poco laat. El a bolbe su cas, come algo y despues a spula su boca cu listerine, ya cu el a skeiro djente caba.
Hues a hacie varios pregunta si el a bebe mas cu loke e ta bisa. A repasa declaracion di e testigonan cu a bisa cu un biaha cu el a bay bar, el a cumpra tres cerbes. Tambe declaracion di mama di su yiunan cu a bisa cu Stephen tabata mustra cansa pero el a nenga y a bisa cu e ta sintie bon. A lesa declaracion di e homber cu ta bende coco. El a bisa cu un Jamaiquino cu ta core un Skyline preto ta core duro tur ora. Un colega di dje tambe a declara cu tur ora e ta bis’e stop di core duro pero e no ta tende.
E acusado ta nenga esaki, pasobra masha poco e ta bay trabou cu auto. E tin dos lift cu su coleganan y ora cu e no tin lift, e ta bay cu e auto. El a bisa tambe cu e no tabata burachi pasobra el a drumi, come y a sinti fit pa bay traha.
Pa colmo, a resulta cu e no tabatin permiso di doño di e vehiculo pa core cu e auto, pasobra e no tin number ni seguro. E polisnan a constata cu e tint di e windshield dilanti di e auto ta hopi scur, e visibilidad ta di apenas 17%.
E test cu el a haci na e sitio di accidente a mustra cu el a supla 287 microgram di alcohol, cu ta riba e nivel permiti legalmente. Ambulance a transport’e pa hospital pa motibo cu el a resulta herida. Eynan tambe a haci un test di sanger. E resultado tabata cu e no tabatin niun pipita di alcohol den su sistema. Segun e acusado a bisa hues, na e sitio ora di supla e polis mes a bisa cu kisas door cu el a spula su boca cu listerine prome cu el a sali di cas pa trabou, el a haya e resultado prome menciona. El a keda insisti cu e tabata apto pa stuur, aunke sin rijbewijs, pasobra e no tabata burachi. E no a bebe hopi y e accidente a sosode ora cu un auto preto a bini riba dje. El a bay hala, baha di caminda, subi bek y a keda slip bay dal den trafico contrario. Un testigo cu a mira e accidente sosode, a bisa cu el a mira e Skyline (stuur man drechi) hala na banda robes, dal den e auto cora. Despues el a mira un señora baha for di e auto cora y saca un baby for di e auto. Fiscal a pidi un castigo di 4 aña. Hues ta bay analisa y dia 11 di mei ta dicta sentencia.
