E siman aki cuater hende lo haya un Cochlear Implant, cubri pa AZV. Fundacion pa Esnan cu Problema di Oido y Habla (FEPOH) a haya como donacion un microfoon special cu e muchanan ta uza den klas. E docente ta bisti e microfoon, cua ta traha cu un tecnologia pa transmiti e stem directamente den e aparato di e mucha. FEPOH a ricibi un donacion di esaki for di e compania MED-EL y nan mes a percura pa busca cuater mas pa asina yuda e muchanan sordo cu Cochlear Implants den klas. A haci esaki pa asina no duna mayor tur e gasto – mirando cu nan ta aparato costoso.
Drs. Steve Cabenda, ta dokter di orea, nanishi y garganta na Aruba, y tambe secretario na Fundacion pa Esnan cu Problema di Oido y Habla (FEPOH). E siman aki, manera tur aña, FEPOH lo tin e C.I. Team di Hulanda cu ta yuda hende completamente sordo, muchanan cu a nace sordo, of hendenan cu ta uza aparato di oido y na cierto momento no por scucha mas sin dje.
Nan lo haya dus loke ta conoci manera un Cochlear Implant. E siman aki lo yuda cuater hende, tres di Aruba y uno di Boneiro.
Drs. Cabenda ta splica cu pa hopi aña caba FEPOH ta bezig y awor e team ta mas grandi. Nan tin dos logopedista aworaki, y nan ta trahando hunto cu docentenan di scol. “Nos team a cuminsa bira mas grandi y nos ta brinda bon servicio na e pueblo,” segun drs. Cabenda. Aworaki FEPOH ta envolvi tambe directiva y trahadonan presente hunto cu profesionalnan di Cochlear implants. “Nos ta hopi agradecido cu tur hende ta trahando hunto pasobra no ta simplemente cu bo ta set e aparato anto bo ta keda cla. Bo mester haci mas cos y bo mester un team pa por yuda e pueblo y hendenan grandi y muchanan sordo.
E ayudo ta consisti di hopi cos, specialmente si ta yuda e muchanan for di chikito te ora cu nan ta adulto pa por tin un funcion tambe den nos comunidad y sinti nan mes inclui manera tur otro persona.
