Den un serie di articulo exclusivo den corant Trempan ta bezig di skirbi over e oportunidadnan masivo di e generacion di tecnologia nobo yama “Tecnologia Exponencial”. E articulonan ta sali tur diabierna bou seccion di Economia.
Ta papia di diferente categoria di innovacion cual cada un riba nan mes lo tin efectonan masivo pa calidad di bida na mundo y na Aruba. Di Algoritmonan avansa di salubridad, pa agricultura sofistica, carpool di auto pa esunnan di menos recurso, 3D printing di cas social, energia solar nobo y te hasta educacion cu inteligencia artificial.
E periodo binidero riba termino largo ta uno hopi bunita mes. Pero kico ta inmensamente importante ta cu tur e rikesa cu e tecnologianan aki lo trece, ta parti na un manera honesto pa full pueblo gosa di dje. Esaki mester bira un prioridad.
Calidad di bida lo hisa masivamente:
Imagina bo costo di berdura fresco pa 50% menos, un cas di $10.000,-, bo costo di coriente na 50 florin y no tin necesidad pa esunnan di menos recurso pa tin e gastonan grandi di un auto y salubridad di generacion nobo. Obviamente e ta tuma tiki imaginacion cu calidad di bida lo ta mas halto.
Tambe importante pa realisa cu por slow down innovacion, pero nunca por stop e completo. Historia ta mustra cu innovacion semper ta gana na final. Dus mester pensa activamente con pa prepara Aruba pa e temporada briyante aki.
Entrada universal: un idea cual su tempo a yega
Un idea cu a tuma forma na añanan 1960 caba na Europa y Estados Unidos ta esun di un entrada universal pa tur ciudadano sin niun exigencia. Dus cada persona lo por ehempel haya 200-300,- awg pa luna sin cu ta rekeri algo di e ciudadano.
Imagina costonan di bida baha den manera drastico danki na tecnologia y cu te hasta ta haya un zakcentje extra. Calidad di bida lo explota halto!
Awo e prome critica lo ta: Simon, Aruba ta failliet, e idea ta zona bon pero con lo haya recurso? Wel, na prome luga ‘UBI’; mane e ta bisa den corto den literatura academico ta paga su mes bek y mas super facil. Tin tanto na tanto articulo academico economico cu ta indica cu crecemento economico ta explota mas halto. Tambe tur otro sorto di indicadornan mane salud personal, relacion familiar, criminalidad, abuso di droga y educacion tur ta afecta positivamente. Dus, ta inverti un poco pa haya hopi bek.
Na di dos luga, tecnologia exponencial lo spaar hopi placa y crea hopi rikesa cu por parti na full pueblo via por ehempel un UBI. Na fin tin hopi herment disponibel tambe pa haya fondo, pa cu un UBI, pero no lo papia publicamente over esakinan den detaye. Pero nos clase politico por uza e articulo aki pa brainstorm.
En fin, tecnologia lo trece un speransa grandi den calidad di bida pa full nos pueblo y cu ideanan mane UBI nos sociedad lo drenta un generacion nobo briyante.
