Aruba ta e prome isla den Caribe cu ta presenta e festival di cine internacional Shortcutz. Brazil, Alemania, Portugal, Inglatera, Angola y China conhunto cu Aruba ta forma parti di e network grandi di Shortcutz.
Tur pais ta conecta cu otro pa medio di Shortcutz Network cu ta brinda un plataforma amplio pa cada talento yega cu nan pelicula na diferente publico riba nivel nacional y internacional. Pa Aruba esaki ta ideal ya cu Shortcutz Aruba ta brinda na talentonan local e oportunidad pa por ‘showcase’ nan peliculanan cu un publico mas grandi y yega na otro paisnan rond di mundo.
Pa e edicion di 2018 a amplia e categoria, ademas di por participa cu cine di ficcion, awor por participa tambe cu cine documental, experimental, animacion y video musical. Mirando cu na Aruba hopi video musical ta wordo produci a dicidi di agrega video musical na e categoria. E aña aki lo tin tres premio; cu ta pa e cine cortico excepcional, e video musical excepcional y un premio pa e talento emergente. Pa e festival aki tur tipo di genero di pelicula ta permiti y tur persona por participa.
No tin un limite di e cantidad di pelicula cu por inscribi, tampoco no tin un limite riba e duracion, ni di e aña cu e cine cortico of video musical a wordo produci. E dia final cu por inscribi ta riba dialuna, 23 di juli 2018, personanan interesa por email nan cine cortico of video musical via WeTransfer na [email protected]. Preferibel manda e cine cortico of e video musical den formato MP4 na resolucion 1920×1080. E prome presentacion di Shortcutz Aruba lo ta riba diasabra 28 di juli pa 7’or di anochi na Ateliers ’89 na Dominicanessenstraat 34. Pa mas informacion por bishita e pagina di Facebook www.fb.me/shortcutzaruba.
