Den un tempo unda ta importante pa ta ‘cool’ y pertenece na un grupo, ta esencial pa papia sinceramente tocante e topiconan cu por no ta asina glamoroso, pero tin un gran impacto riba nos salu y bienestar. Un di e topiconan aki ta e uzo di sigaria electronico, tambe yama Vaping. Hopi hoben y mayor tin un idea falso tocante e riesgonan di Vaping, loke por hiba na problema serio di salu a largo plaso.
Director di dr. Horacio Oduber Hospital, Jacco Vroegop, kende tabat’ey presente durante e charla n’e scol, a expresa su orguyo tocante e esfuerso di e specialista di pulmon, Caroline Becker, kende recientemente a para dilanti di un klas di studiante di tweede klas na De Schakel College pa informa nan tocante e peliger di Vaping.
Ta un idea falso cu Vaping ta un alternativa inofensivo pa humamento tradicional. Al contrario, Vaping por hiba na problema serio di salu, manera iritacion y daño na e vianan di aire, batimento di curason y un riesgo mas halto di cancer.
Un di e aspectonan mas preocupante di Vaping ta e echo cu hopi sigaria electronico tin mas nicotina cu un paki di sigaria, loke ta intensifica e adiccion y por causa daño n’e desaroyo di e curpa humano, specificamente e curpa di e hobennan.
Nicotina por causa daño permanente n’e desaroyo di e curpa humano y aumenta e riesgo di diferente problema mental.
Caroline Becker a tuma un paso importante door di para dilanti di un klas di hoben na De Schakel College y duna nan un charla informativo tocante Vaping. Durante e charla aki, no solamente a comparti e factornan, pero tambe e riesgo y e mitonan rond di Vaping.
Tabata un ‘eye opener’ p’e hobennan pa tende tocante e impacto cu Vaping por tin riba nan salu y nan futuro.
Ta importante p’e scolnan manera De Schakel College tene nan portanan habri pa iniciativa di informacion manera esaki, p’asina yuda e hobennan informa miho tocante e riesgonan di Vaping. Dr. Horacio Oduber Hospital ta sigui duna nan sosten total y contribucion pa fomenta conscientisacion y para e uzo di sigaria electronico entre e hobennan.
Ta gradici tambe dr. Caroline Becker y De Schakel College pa nan esfuerso y compromiso den e iniciativa importante aki. Hunto ta pone enfasis riba un futuro consciente y mas salud pa nos hobennan.
