Despues di a completa e dos proyectonan grandi aki, Watty Vos Boulevard (WVB) y Green Corridor a presenta varios reto pa DOW. Tambe nan a ricibi varios pregunta di comunidad di algun desaroyo cu a tuma luga riba e dos careteranan principal aki.
Un di e obstaculonan cu e publico en general ta topa cu ne frecuentemente, ta buraco den caminda.
Ir. Jossy Kock, hefe di e departamento di ehecucion, como tambe encarga cu e unidad di PPP Private Public Project), a splica na momento cu un auto sufri un daño pa motibo di un buraco of un obstaculo den caminda, tin un procedura pa cana.
Na momento di e incidente e chauffeur ta yama su seguro, cu na su turno ta manda e reclamo na e persona cu ta haci e rapport. Despues di esey e rapport mester ta entrega na DOW, cu na su turno ta entrega e rapport aki na e contratista, esey ta si en caso tin un obstaculo of buraco den caminda cu un di tres partido no a ocasiona.
Un otro aspecto cu Kock a splica ta riba e geotextiel cu por mira na e brugnan na Meiveld y Hato.
E material aki tin buraco den dje caminda cu vegetacion por crece door di dje. Por tin awasero pisa, pero ta wanta toch e tera pa e no bin abao, causando asina un peliger riba caminda. E lo tuma tempo pa e e yerbanan aki crece y ta visibel.
Si pasa riba tanto Watty Vos Boulevard como Green Corridor, por tuma nota cu na luga di e seronan di santo, tin un berm color blanco cu ta separa e caminda. E berm aki ta pa no haya e autonan ta crusa di un banda pa otro. Tambe ta haya cu actualmente tin un proyecto cu tin cu bay cuminsa unda cu ta bay pone e blokinan na e parti memey.
Riba e caminda di Tanki Leendert/Solito (Kamerling Onnesstraat) tin diferente tapa di rioolering. A keda di drecha e caminda door di nivela esaki pasobra tin di nan auto ta pasa dal ariba.
E proyecto aki, segun ir. Jossy Kock, ta bay door. E ta un proyecto combina cu gobierno y FCCA, pasobra FCCA a laga di haci e trabao di conecta e rioolering riba e sistema di gobierno pa locual cu a sosode. Esakinan cu tin riba caminda, ya DOW ta bezig cu FCCA pa asina bay atende e problema aki. Hunto nan lo bay drecha e parti di caminda aki.
Tambe ta haya e aspecto di awasero. Na momento cu awa yobe, Watty Vos Boulevard ta yena cu awa. Segun ir. Jossy Kock, ta bezig cu e contratista pa atende cada un di e puntonan aki, unda cu tin hopi awa cu ta keda para pa soluciona esaki.
Ya e contratista a presenta e solucionnan na DOW. Awo ta cuestion di traha riba dje pa asina e problemanan keda resolvi.
