Dos dama a pasa den un rato amargo na momento cu nan tabata di bishita den un casino na Playa. A yama polis y pidi nan pa bandona e localidad.
Diahuebs merdia, den careda di 12:45 pm, polis a presenta na un casino den area di Playa pa dos dama cu no tabata tene nan mes na regla di hygiena relaciona cu COVID-19, cual ta e uso corecto di tapaboca. Na yegada polis a topa cu un mama y su yiu cu ta clientenan regular di e casino en cuestion, disgusta pa locual a pasa cu nan.
A splica cu mientras nan tabata disfruta di e weganan di mashin, un persona di departamento di gobierno encarga den e casino, a acercanan y pidi e mama pa bisti su tapaboca corectamente. E dama no a gusta e peticion mirando cu hende sinta bandi dje tabatin su tapaboca completamente baha y no a bis’e nada. El a sinti cu e contoleur lo tabatin un teima cu ne.
Polis a presenta y a scucha ambos partido riba kico a tuma luga. A compronde, pero ta di acuerdo si, cu mester ta consecuente ora ta reenforsa regla. E tin cu conta pa tur hende. Segun e señora, no ta solamente turista pero e propio personal di casino tin cu tene nan mes na regla y uza e tapaboca corectamente tambe. Den su bista, nan mester ta ehempel y esaki no tabata e caso awe. Di parti e controleur, a duna di conoce cu nan cu ta trahando mester por hala rosea.
E yiu muhe cu a compaña e mama tambe a duna su punto di bista. A conta cu su mama ta un cliente vast di e casino, cu pa hopi aña ta bishita e localidad. E tapaboca ta un molester ta berdad, y tin biaha ta baha esaki pa por hala rosea miho. Y esey ta locual cu a pasa.
Den su opinion, cu e persona aki no a tuma nota di e otro bishitantenan pero a bin unicamente riba su mama. Tabatin hopi otro hende cu nan tapaboca robes poni pero a opta pa no haci caso di e otronan y a bin teima unicamente cu su mama. El a bay asina leu di yama polis pa su mama. A sinti cu e por tabata un poco mas comprensivo cu e situacion.
