E siman aki lo tin den corte caso penal contra dos acusado cu tin di haber cu abuso sexual of perversion sexual. E ultimo aki tin di haber cu actonan cu no ta directamente abuso sexual pero cu a afecta integridad di e victimanan. Ta papia aki di en total 12 delito cometi door di e dos acusadonan aki.
Diahuebs den oranan di merdia tin un caso Pro Forma contra e homber Goyechalife Panthophlet. E tin tres acusacion contra dje: di a abusa sexualmente di tres persona riba tres diferente fecha, esta 28 di maart 2023, 26 di april 2023 y 28 di october 2023.
Como cu e dossier no ta completamente cla, lo pone un fecha nobo pa su tratamento.
Esun cu lo presenta diabierna mainta den corte ta Christiaan Alexander van Aurich. E ta un persona cu e pagina di Facebook Ta Basta a denuncia publicamente na mas cu un ocasion.
E tin en total nuebe acusacionnan contra dje: Ta acus’e di a comete abuso sexual di nuebe persona menor di edad den e periodo di april 2019 te februari 2022.
Ta acus’e di a viola castidad y decencia na luganan publico (den cercania di dos scol y na Seroe Blanco) den e periodo di december 2021 te febuari 2022, door di mustra su parti intimo y masturba; e ta wordo acusa di distribuimento y posesion di pornografia infantil di aña 2019 te aña 2022, door di saca potret di un persona menor di edad.
E ta wordo acusa di intencionalmente manda fotonan ofensivo y indecente di su parti intimo na tres of mas persona den e periodo di april 2019 te februari 2022.
Tambe ta acusa van Aurich di a viola decencia na un luga publico (un hotel) riba 20 di februari 2023, door di drenta baño di dama y mustra un persona su parti intimo.
Tabata den luna di juni aña pasa cu e homber aki, Christiaan A. van Aurich, biba na Ponton, a cay den man di husticia pa su sed sexual pa menornan di edad, segun denuncia haci e tempo ey door di plataforma Ta Basta. Nan ta un grupo di presion cu ta sali na vanguardia di victimanan di abuso sexual, contra pedofiel y hombernan abusado en general.
Ta Basta ta existi riba red social desde februari di aña 2014 y tin 20 mil siguido. Nan ta haya tip, hopi biaha anonimo, di casonan di abuso den comunidad. Nan ta yuda victimanan den e proceso dificil pa dicidi pa entrega keho, haya proteccion y di tin hende cu experencia pa guia nan den e proceso emocional y doloroso di keha bo abusado, cu hopi biaha ta un conoci, un famia of te hasta bo pareha!
Den e caso di van Aurich, nan a menciona cu e ta conoci pa e tipo di actonan aki y cu e ta gusta move den area di scol, parke y cinema. E tabata yama hobennan bin tende na auto mientras e ta hunga cu su parti intimo pa satisface su sed sexual.
TA BASTA a haci apelacion na e hobennan cu a bira victima di e homber aki pa haci denuncia. Y asina, despues cu a lag’e liber inicialmente, na luna di juli, ora cu mas denuncia a drenta, a detene. Y esey no tabata ni prome ni di dos bes cu el a yega di wordo deteni.
Finalmente a detene y awo su caso ta bini dilanti diabierna awo.
