Cua caso e ta, no ta confirma ainda, pero awe tardi recherchenan di e ekipo special cu ta investiga casonan di atraco a presenta na un cas na Bushiri y ey a detene dos sospechoso. A boei nan mannan tras di nan lomba y na rudia a laga nan warda na suela riba transporte di pols, cu a transporta nan pa ward’i polis pa ey e proceso di interogacion por cuminsa.
E recherchenan di Atraco Team a presenta di sorpresa riba dos hende homber, di apariencia hoben, na e cas situa na Bushiri 176. Ey a identifica nan mes como autoridad y a detene nan tur dos, sospecha di lo tin di haber of sa mas di un of mas atraco cu a tuma luga riba nos isla. A informa ambos sospechoso di nan derechonan y a laga un patruya hiba nan ward’i polis pa ey presenta nan dilanti un subfiscal pa e procedimiento penal por cuminsa.
No por confirma ni descarta cu ta trata di e caso di atraco cu a tuma luga awe mainta riba vehiculo di delivery di Pizza Hut den area di Sasaki. Ey dos homber, cu capuchon y cu arma di candela den man, a agredi e chauffeur di e auto di entrega, kita e auto fo’i dje, kita su celular fo’i dje y bay cu un botin di no menos cu 18 mil florin cash.
Mester menciona cu e detencion aki na Bushiri ta algun caya cerca di Pizza Hut Restaurant, pa cual no por descarta cu e dos sospechosonan aki por tin algo di haber cu e atraco arma di awe mainta. Claro cu tur sosten y cooperacion for di pueblo ta bonbini. Yama 11141, e tipline di polis y laga bo mensahe cu bo informacion y den forma anonimo, yuda na soluciona un otro caso di atraco mas!