DLS a celebra 8 aña cu su fanaticonan

Den fin di siman tabata e gran dia pa e famoso banda local DLS (Delicious). Dia prome di juni ultimo nan a cumpli 8 aña di existencia y manera tur aña ta organisa un evento den cual por celebra e fecha special aki cu nan publico.

E celebracion e aña’ki a tuma luga na Balashi Beer Garden y e regalo pa e publico tabata dos banda for di exterior, cualnan tabata e bandanan di Corsou Hype y One, kendenan tambe tin hopi fanatico na nos isla ruman.

Lider di DLS, Jerino Bass, a expresa di ta hopi contento cu e resultado despues di e preparacion grandi cu a wordo haci pa celebra nan 8 aña di existencia manera cu ta 10 aña ta celebrando.

“E anochi aki e publico y ami mes a wordo sorprendi cu e presentacion di J’eon, kende a presenta cu e banda Upgrade. Mi a trata di hay’e pero e tabatin compromiso na Merca pa dos luna largo. Sinembargo el a haci un esfuerso y a sorprendemi y e publico ora cu el a yega subi escenario cu Upgrade. Danki ruman pa e sorpresa aki,” Jerino Bass cu hopi alegria a expresa.

DLS tin un cancion hopi pega na e momentonan aki cu ta “Aw’i wowo” presenta pa Tyron de Freitas, pero Jerino a priminti cu tin hopi mas na caminda. “Tin cosnan nobo na caminda. Sorpresanan bunita,” Jerino a bisa.

Pa finalisa e lider musical di DSL a bisa cu tur aña nan tin e reto pa “upgrade” nan repertorio, produci cancionnan  nobo, trece cosnan cu e publico ta gusta y cu a haci nan asina popular. “Danki na tur radio-emisora, locutornan, nos famia y e publico cu semper a apoya nos desde nos prome toca. Danki.”