Proximamente lo tuma luga un competencia grandi di Poker Internacional di Las Vegas, esta e World Series di Poker, caminda cu hungadonan di tur parti di mundo lo bay ta parti di e competencia aki y Aruba no a keda afo.
Aruba tambe lo tin hungadonan cu lo bay participa y ta premionan di miyones esaki ta bay tin na Las Vegas.
Nos tin profesionalnan cu ta hunga wega di poker y nan lo representa nos pais, Aruba. Nos a combersa cu Marta Martis, kende ta un consultant y ta wordo paga pa hunga pa hende y a splica riba e competencia aki.
Aruba cla pa competi den torneo di Poker mas grandi di mundo na Las Vegas
Posted by 24ora on Monday, June 3, 2019
E competencia ta un hopi grandi, Marta ta bisa. Ta bay tin mas of menos 7 mil hungado. Ta 10 mil dollar pa drenta y ta un torneo hopi importante pa Aruba competi den dje, pa wak si por pone Aruba riba e mapa internacional di Poker. Esey ta bay duna Aruba mas turismo y hendenan cu ta gusta hunga poker, por bin hunga aki na Aruba tambe.
Ta spera cu un di nos hungadonan local por yega den e finalnan ey, tanto pa nan gana hopi placa, pero tambe pa nan pone Aruba riba e mapa, cual Marta ta haya cu ta e parti di mas importante.
Hungadonan di poker
Marta ta conta cu actualmente tin varios hungado cu ta bon, pero un conoci di dje, Junior Chang y Peter Sussebeek, nan ta hopi bon mes den e wega. Nan ta bon prepara pa bay den e competencia aki na Las Vegas. Tin algun hende mas cu ta hunga bon, pero no sa si nan por haal’e, pasobra ta hopi placa pa drenta den e torneo aki.
Secreto
No tin realmente un secreto, sino bo mester tin hopi habilidad y tambe conocemento di e wega. Tambe bo mester tin suerte na bo banda tambe, segun Marta. Hopi hende ta bisa cu “I better be lucky than good”. Marta ta bisa “I better be good than lucky,” pasobra e mes no tin luck at all, el a bisa na un manera chistoso.
Exposure
Marta ta bay purba di haya e exposure ora cu nan bay Las Vegas. Door cu Aruba ta un isla hopi chikito, si e bay cu e hungadonan local, lo bay purba di haya exposure pa Aruba naturalmente.
E ta spera di haya un cita cu minister di turismo, pa por mira si por haya algun backup di nan parti, pa nan por bay cu nan na Las Vegas, manera flanel, of algun otro material di promocion.
Si Marta bay cu nan, e ta busca e forma pa haya e exposure pa Aruba. Mas di 100 mil hende ta bay wak e torneo aki tur aña. Nan ta pas’e por ehempel na ESPN.
Competencia
E competencia tin un duracion di 7 dia y ta dura oranan largo. Nan ta hunga 12 or pa dia y si bo cualifica e prome dia, e di dos dia bo ta descansa. E di tres dia tambe bo ta descansa y di cuater dia ta hunga. E torneo ta cuminsa di 3 di Juli proximo.
Segun Marta, ta purbando awor aki pa haya e conexionnan necesario pa asina por drenta e competencia aki. Marta mes tin varios conoci den e mundo aki, entre otro Chris Moneymaker. Si e mes bay, e lo wak con e ta haci pa Chris yuda pusha e hungadonan local aki, pa Aruba haya un cobertura maske ta di dos minuut.
Mas hende?
Ta bay tin por lo menos tres hende mas cu lo bay e torneo aki. Actualmente tin un torneo andando y esun cu gana lo por bay competi den e torneo aki grandi aki.
