E daño causa door di e pandemia na e industria di entretenimento ta gigantesco y e musiconan sigur ta e prome nan den sufri di esaki. Sinembargo, awo cu a cuminsa na flexibilisa e medidanan, por ehempel a hala e orario di Toque de Queda bek pa 12:00am, a haci cu varios negoshi a cuminsa planea nan actividadnan y esey ta inclui entretenimento.
A base di esaki, DVG a saca un publicacion caminda cu ta menasa cu si bin cu entretenimento, mencionando nomber di musiconan, cu lo bin cu medida.
Albert Vrolijk, conoci como DJ 101, cu ta forma parti di Aruba Entertainment, a anuncia cu gran parti di e publicacion di DVG no ta berdad y nan ta contento cu DVG a hay’e ta rectifica masha lihe! Aruba Entertainment ta masha cauteloso cu organisacion di eventonan. Nan mes a papia cu miembronan di Crisis Team riba e protocolnan.
Ningun DJ of musico cu ta resorta bao di Aruba Entertainment no ta kibra protocol. Tin luga cu tin permiso di restaurant y cafe, cu segun e mesun protocol di DVG, ta permiti un solista of DJ mientras cu e ta background.
Albert Vrolijk a enfatisa cu no mester mescla un cos cu otro. Loke ta e area di hotel no a haya luz berde pa entretenimento. Sinembargo hotelnan si, creando un division den e mesun industria aki.
