Den cuadro di celebracion di apertura di aña Parlamentario nobo, a realisa awemainta e ceremonia tradicional den cual e punto di mas resaltante ta e discurso cu Gobernador di Aruba ta trece dilanti.
Manera ta conoci, e contenido di e discurso ta un colaboracion entre Bestuurskantoor y Gabinete di Gobernador den cual ta busca pa haci un analisis di e 12 lunanan tras di lomba, pero tambe ta conscientisa y lanta moral cu proyeccionnan pa futuro.
Entre e puntonan cu Su Excelencia Gobernador Juan Alfonso Boekhoudt a trece dilanti awemainta, naturalmente e pandemia di COVID-19 y su consecuencianan den tur ramo di nos bida, a hunga un papel principal.
“E situacion sin precedente aki pa pone e fibranan di nos sociedad na prueba y ta reta e politiconan pa pone nan diferencianan un banda pa bienestar general,” tabata entre otro su palabra al respecto. Economia y finanzas pueblo ta conoce un situacion cu e mandatario a describi como ‘inmenso.’
Consecuentemente, el enfatisa cu apesar di tur cos, e trias politica mester mantene su mes firme pa garantisa ordo di estado. “Parlamento, Gobierno y sistema hudicial a keda funciona.”
Su Excelencia Gobernador Boekhoudt a defini e gravedad di nos realidad actual bisando cu “Superlativonan no ta suficiente pa describi e magnitud di e crisis cu e coronavirus a ocasiona pa nos isla, ni e repercusionnan cu lo tin den e periodo nos dilanti.”
Gobierno hunto cu Parlamento tin e tarea pa reenforsa e capacidad di recupera di nos comunidad, pa crea e cuadro pa por resisti efecto di factornan externo y tambe stimula economia a base di innovacion, logistica y technologia — sectornan cu mundialmente a resulta di ta menos afecta durante e periodo di crisis aki.
Loading…
Reload document 
Open in new tab Den e discurso ta admiti cu Gobierno, ni Parlamento por haci esaki nan so. Mester uni forsa, pone diferencianan un banda y pone nos mira riba recuperacion di nos isla. “Den e ultimo dianan aki a nota demasiado division, proteccion di podernan politico, falta di disponibilidad pa un dialogo genuino, unda participantenan ta kibra cabes hunto pa forma un solo frente pa Aruba por recupera di e crisis aki. Nos no por keda pega den erornan di pasado y purba desacredita otro, y spera cu esey lo alivia nos situacion. E crisis aki a pone un spiel nos dilanti, y e tempo a yega pa reenforsa e pilarnan di nos sociedad.”
A haci mencion di e Masterplan “Reposicionando Rumbo di nos Pais” riba cual mas cu 100 profesional di sector publico y priva a traha y cu lo usa como herment pa percura pa un transicion exitoso for di e crisis actual pa un modelo economico nobo; cu ta sostenibel, inclusivo y capas pa recupera su mes rapidamente di e efectonan di cualkier shock den futuro.
Mas aleu, e discurso di Su Excelencia Gobernador Boekhoudt a repasa terenonan di educacion, salubridad y husticia mencionando proyecto y intencionnan cu Gabinete Wever-Croes tin fiha. Algun mencion notable ta e obhetivo pa trece entre 515 pa 660 mil turista durante 2021, ley di financiamento di organiscion politico y di ombudsman cu Parlamento mester trata y inversion den infrastructura pa cuido di anciano. Resaltante tabata con Gobernador a indica cu e aña Parlamentario cu ta inicia lo ta caracterisa pa un relacion nobo y diferente cu Hulanda, basa riba e decision cu Gobierno lo tuma e siman aki. “E relacion nobo aki lo influencia grandemente e maneho di Gobierno den futuro.”
