Diabierna ultimo Hues den un caso laboral a ordena Fundacion Lotto pa Deporte pa tuma mr. Di-Stefano Wernet bek den funcion, debi cu no a haya cu tabatin motibonan urgente pa kit’e “op staande voet” for di trabou. E fundacion tabatin un lista di motibonan cu nan a considera valido pero Hues no a considera nan urgente. Sinembargo, debi cu a bin pruebanan nobo y circumstancianan nobo, ayera dialuna mes a suspende Wernet pa tres siman mas debi na un investigacion pisa andando internamente.
Presidente di Fundacion Lotto pa Deporte a nenga di contesta preguntanan awe, pero a confirma cu Di-Stefano Wernet no ta bolbe den e funcion di Director di FLPD por lo pronto. Riba nos pregunta cu si e ta suspendi, e no kier a contesta y tampoco si berdad ta investigando e Director pa malversacion y corupcion. El a referi nos na abogado di e fundacion pa mas informacion.
Di acuerdo cu informacion disponibel, for di algun luna caba ta investigando Wernet pa un lista di asuntonan cu no ta mucho cla pa e Hunta di Supervision. A sinta na mesa cune, a suspende di su funcion, despues a pone bou di curatela financiero y como cu e comportacion y practicanan dudoso no tabata cambia, a tuma e decision drastico di kit’e for di trabou.
Fuentenan bon na altura di e investigacion forensico andando no ta descarta cu un keho penal lo sigui awor despues cu e trabou preliminar di investigacion di accountant ta cla. Ta sospecha cu tabatin malversacion di sumanan cuantioso pa cual e Director lo mester responsabilisa su mes awor. Locual lo sosode awor ta cu posiblemente e procedimiento civil lo cana man den man cu esun penal.
