Ayera Centro di Bario Playa Pabou a celebra Dia di Hende Muhe. Dennis Burke, presidente di e centro di bario, a conta cu pa basta aña e ekipo di Centro di Bario Playa Pabou ta organisa evento riba Dia di Hende Muhe.
Ta organisa evento specialmente pa hende muhe, pero naturalmente algun hende homber tambe ta acudi na e evento. Burke ta considera cu e actividad tabata exitoso.
E topico tabata informativo y a hiba e nomber di ‘Papiamento, e herment pa nos desaroyo’. A scoge e topico aki, pasobra Dennis Burke a pensa kico nos ta haciendo cu nos Papiamento. El a basa su mes riba e discusion tocante cu kier introduci Papiamento na scol.
El a invita Joyce Pereira, kende a splica di un manera intensivo riba e topico. Dennis Burke ta convenci cu Papiamento mester drenta nos scolnan.
Esaki ta mas cu 15 aña caba cu ta organisa un evento riba Dia di Hende Muhe, unicamente a keda sin organis’e pa un aña pero tabata pa motibo di Covid. E hendenan cu bay e actividad lo sigui bay. Durante e actividad por conta tambe cu poesia. Tabatin varios cantante tambe cu a deleita e personanan cu a bishita e evento.
Tambe durante e anochi a trata e derechonan di e hende muhe, ta importante pa sa con a cuminsa cu e lucha aki. Burke ta conta cu esaki a cuminsa na 1908, na momento cu tabatin welga na Merca.
E empleadonan di tela a bay den accion pa motibo cu nan kier a traha 8 ora, tabata kier miho condicion di trabou pero tambe nan tabata desea di haya e derecho di vota. E tabata un lucha cu awo a logra cu Nacionnan Uni a pone 8 di maart como Dia Internacional di Hende Muhe.
Na final, Dennis Burke a gradici tur cu a haci e actividad aki posibel.
