E situacion di Covid-19 sigur a afecta Aruba henter. El a afecta DIMP tambe, segun director Luenne Pieters. Na cuminsamento nan tabata preparando pa cuminsa otorga plachinan di number, pa motibo di presupuesto mes, no tabata na tempo. Ora cu tabata cla pa cuminsa, dia 13 di maart a haya e prome caso. Mester a bay bek y cuminsa pensa con otro por haci’e na un manera diferente. Eynan e idea di e drive thru a nace. Tabata tin seis fin di siman cu a parti plachi den masa, den un forma di drive thru.
Tabata un idea di e team mes, cual tabata un tremendo idea. Pa Pieters mes y pa henter e team tabata completamente nobo y tabata exitoso. Clientenan a sinti nan safe den nan mes un auto. Nan no mester a para den rij ni den solo. Naturalmente e personal si a para den solo, pero esey ta menos mal. Tabata tin interaccion cu e cliente y esey a wordo hopi bon acepta. E clientenan a haya esey hopi bon. Mester a cambia e manera con nan ta opera y duna servicio. Por mira tambe cu a cuminsa caba entrante januari cu e contribuyentenan por entrega nan formulario di declaracion mensual den un forma digital. A comunica esaki varios biaha y a tene diferente sesion, na Camara di Comercio, na ATIA, na DIMP mes.
Por a mira poco poco e clientenan tabata drenta. Pero manera e pandemia a manifesta su mes, el a acelera e proyectonan di digitalisacion andando. Awo por pidi persoonsnummer via website di DIMP. Por cambia cuentanan di banco digital, un inkomstenverklaring por hay’e digital, etc. Awor aki ta sacando e loonbelasting vermindering digital y ta bay digitalisa tambe e proceso pa pidi un areglo di pago flexibel, caminda cu e cliente por indica cu e tin un debe y por pag’e den parti etc. El a trece hopi cos bon. Berdad el a trece hopi preocupacion, preocupacion financiero, tambe pa cu entrada, pero di un otro banda el a duna si e oportunidad pa esnan den gobierno y sector priva tambe, cu tin un wowo pa oportunidad den crisis.
DIMP a haci un bon uzo di e situacion pa digitalisa no solamente nan formularionan, pero servicio. Awor aki e front office no ta habri mas pa publico. Ta habri solamente pa efectua solamente un pago di impuesto, na MFA y tambe na Camacuri. Ta encurasha e clientenan pa paga mas tanto cu debit card y no cash. E pagonan cu debit card ta bay hopi lihe. Hasta e servicio di DIMAS, caminda ta manda puntra e inkomentoest di un cliente ora cu un hende ta pidi un permiso, tambe ta bayendo na un manera digital, caminda cu e sistemanan ta puntra otro. Por wak cu ta crea un balor agrega na e cliente. E tempo cu nos ta biba aden cu mester pensa banda di gobierno, kico por haci pa por facilita e contribuyente pa por paga. Den caso di DIMP kico por haci pa facilita e cliente cu informacion, kico mester paga, den ki termino por paga y con por haci esaki.
Den e manera cu a bin ta hacie ta un manera digital. Ta mira cu hopi contribuyente kier tin e contacto si. Nan ta purba di yama via telefon, nan kier papia cu un hende, kier un extra splicacion. Mester a cambia tambe e mindset y tin cu contesta telefon, tin cu contesta email. No por laga e cliente den un incertidumbre, vooral si e cliente ta acerca y kier paga su debenan di impuesto. Segun Pieters, e ta haya e parti full positivo den e situacion di pandemia, cu mester a cambia e mindset. E cambio ta bin cu bo mes. Hopi biaha tin cu cambia nos pais, pero ta cuminsa cu bo mes. Ta cambia bo mesun perspectiva, bo mesun pensamento.
