Samuel Sarmiento ta un pintor cu ta exponiendo su pinturanan hunto cu Adriano Nanof, un artista sonoro. E ta splica cu su exposicion ta basa riba Biento y Awa y ta tumando luga den Cas di Cultura. Sarmiento ta invita un y tur pa bin admira e exposicion aki, unda cu por mira simbolonan di Caribe, historianan tropical, hopi color, di tur un poco.
E idea Sarmiento a splica cu na prome luga cu lo mas importante di e colaboracion ta pa reactiva e espacionan. E aña aki, 2020, tur tin e necesidad di haci actividadnan cultural. Mirando cu e sa cu Adriano ta traha cu arte auditivo, a dicidi e ora pa haci e exposicion aki na Cas di Cultura, gradiciendo cu nan a habri nan portanan. Tambe ta manera un necesidad pa cuminsa cu iniciativanan cultural riba e isla.
Biento y Awa
Basicamente nos ta riba un isla cu ta Aruba. Nos ta rondona pa awa y tambe nos ta rondona pa aire. Lo ta manera e dos elementonan cu nos tin contacto cu nan henter ora. Lama cu ta un masa di awa cu ta crea mil storia y biento, cu ta transporta e zonido. E ta haci cu e matanan ta zweef y cu e parhanan ta bula, como tambe e zonido ta zona. Cu esey nan ta hungando awo.
Fantasianan di color
Sarmiento tin e fantasianan di color. E gusta e color oranje hopi. E ta yama su atencion mirando cu nos ta den Oranjestad y ta manera e estado Oranje. Ta manera un mescla cu e blauw di Aruba y e oranje cu por wak den e pinturanan.
Di dos exposicion
Awor aki ta pensando riba un di dos exposicion, pero no tin un luga ainda. Sarmiento ta pensa cu esaki lo ta super.
Zonido
Adriano Nanof ta haci e musica cu ta inspira pa Aruba durante e exposicion aki. El a bay rond di Aruba, den mondi, den lama, riba beach, graba hopi zonido y a haci un piesa cu ta inspira riba nos isla. E ta manera un simfonia di casi un ora. E tin tur e zonidonan cu ta hunto haciendo e musica aki.
Cuanto tempo
Nanof a splica cu e produccion ta uno basta largo. El a haci grabacion di zonido pa hopi tempo caba. El a haci grabacion pa varios luna pa asina haya e zonido specifico cu e tabata kier. Manera zonido di cacho, di pushi, di auto, tur cos cu e tabata kier a pone den e piesa aki. Tambe zonido di lama ta hopi importante pa e artista. El a bay hopi biaha lama pa scucha e olanan, cual e gusta masha hopi mes. Tambe el a gara hopi zonido di biento, cu ta parti di e exposicion aki, cu yama Awa y Biento. Awa ta representa den e pinturanan di Samuel Sarmiento y biento ta e piesa musical cu Nanof a haci. E zonido ta e biento cu ta move den e aire.
Sensacion
Nanof a busca pa pone e sensacion cu e tin na Aruba. Tur caminda cu el a bay tin zonido specifico. Tambe el a graba prikichi, fuera di cacho cu pushi, como tambe el a graba trupial. Un biaha el a bay pa graba sintando bao di palo caminda cu tabata tin hopi prikichi y tambe hopi trupial cu ta canta cerca di e microfono. E tabata un sensacion hopi dushi. Cu e inspiracion di naturalesa y e ciudad tambe, Nanof a compone e piesa aki cu ta bay man den man cu e exposicion di Samuel Sarmiento, Awa y Biento.
