“Organisado di concierto no a tene cuenta cu procedura di permiso pa evento cu artista internacional”, asina un comunicado di prensa emiti pa Departamento di Integracion, Maneho y Admision di Stranhero (DIMAS). Ta referi na organisado di e evento “Duelo de Generos” cu mester a tuma luga diasabra anochi den Harbour Arena.
Den e caso di e concierto di weekend aki lamentablemente a entrega peticion di permiso pa e artistanan di Colombia conhuntamente cu nan acompañantenan, den dos batch respectivamente dos y tres dia prome cu e evento!
“Pa evita cualkier inconveniencia den futuro, DIMAS ta haci un apelacion na tur organisado y promotor responsabel di eventonan cu artistanan of personanan cu lo bin for di exterior, pa regla tur procedura di permiso cu anticipacion y no menos cu dies (10) dia laboral prome cu e evento”, asina e comunicado a termina bisando.
Mester menciona cu, separa di evento musical, tabatin un show di comedia den Cas di Cultura cu tambe un artista a keda afo. No a lag’e drenta Aruba pa falta di permiso.
Parce cu e promotornan den fin di siman a purba di tur forma pa regla e asunto via e canal politico, a yama tres minister pa interveni, pero na final no a logra toch. Tur promotor sa cu mester pidi permiso no menos di dies dia adelanta. Kico a pasa pa core bay DIMAS diahuebs prome cu e evento diasabra, ainda no ta conoci!
