Fundacion Nine Lives Aruba tin dos actividad pa recauda fondo pa por sigui cu nan trabou di rescata y cuida pushi di caya y alabes yuda e animalnan aki haya un miho futuro. Diasabra lo tin un Dia di Adopcion na Bestial Pet Shop na Tanki Flip 119, local 1. Aki lo tin posibilidad di cera conoci cu e proximo amor di bo bida.
Lo tin diferente pushi presente di diferente grandura, color y edad y pa solamente 60 florin bo por hiba bo mascota nobo cas. Tambe bo por cera conoci cu Firulais, un Cocker Spaniel di 5 luna bieu cu ta buscando un hogar pa nan dun’e amor y atencion.
Diadomingo 5 di juni for di 10:00 am te cu 5:00 pm por pasa na Jaburibari 8-b, schuin dilanti Parke Curason y mira tur e articulonan di cas, buki, asesorio, sapato, paña y hopi otro cos mas cu lo tin na benta. Sin lubida e tur e bunita matanan cu Geraldine a planta cu hopi amor y cariño pa asina abo por hiba cas na un bon prijs. E biaha aki e actividad lo tin un sorpresa adicional: cu cada compra di 10 florin lo bo participa na un rifa di un gift certificate di 100 florin di Superfood. Diadomingo anochi pa 8:00 pm lo saca e ganado en bibo via di nan facebookpage Nine Lives Aruba Foundation.
No perde e chens di adopta un compañero fiel y/of cumpra hopi producto di bon calidad na un bon prijs y di e forma aki contribui na cuido y rescate di pushi riba caya.
