Cu e lema “Ban Lesa, Biaha y Gosa”, Biblioteca Nacional Aruba a inicia e di 27 apertura di festival di buki pa mucha.
E aña aki, manera tur aña tin un cancion masha bunita mes di Makitay de Jong. Titulo di e cancion ta “Ban Keiro”, un composicion di Zulaika Geerman. Segun directora Astrid Britten, ta parti di e programa y naturalmente ta bay tin e scol cu lo haci e apertura, cual ta Pius X School na Dakota.
Cu hopi expectativa riba esaki, tin cu bisa cu Robert Reiberg cu den pasado a yega di compone diferente cancion di festival di buki, tambe ta bay tin un videoclip di un di e cancionnan, “Sigui Lesa Bay.” Esaki lo keda estrena durante di e apertura tambe.
BNA ta contento di presencia di e librerianan y cu un esfuerso grandi di trahadonan di BNA, pa reconoce nan trabao tambe, ta bay tin 14 autor. Diabierna tabata e inicio oficial, pero e trabao mes ta bay ta durante di e siman dialuna 4 di november, esta awe, te cu diabierna dia 8 di november, ya cu e autornan ta pasando 64 scol, entre nan scolnan basico, scolnan preparatorio y tambe scolnan special.
Cu esaki BNA kier a duna un dimension na e actividad aki, unda cu na prome luga ta poni e promocion di lesamento, ya cu sea bo ta lesa den forma digital of forma fisico, e habito di lesamento pa bo tin dominio di esey ta hopi importante. Tur esaki ta haci’e pa amor pa lesamento, segun Britten.
