E crucero Zuiderdam despues di a bandona Aruba diasabra casi mey anochi a bolbe Aruba dialuna mainta tempran debi na un emergencia. Zuiderdam ta bishita Aruba regularmente. El a yega merdia y e pasaheronan tabatin chens di disfruta di Aruba pa dies (10) ora largo ya cu un poco despues di 11’or di anochi el a bandona Aruba. Su siguiente dia riba lama grandi, a haya nan mes cu un emergencia medico. Un di e pasaheronan abordo a bira basta malo. Mirando e situacion, e capitan a dicidi pa bolbe Aruba, cu tabata e waf mas cerca y cu miho conexion si mester traslada e pashent.
Zuiderdam a yega Aruba bek dialuna mainta y despues cu a baha e pashent, a bandona nos isla y a sigui pa su siguiente waf cu ta Cartagena, Colombia, despues Puerto Limon (Costa Rica) y finalisa na Fort Lauderdale (Florida). E crucero ta riba un biahe cu a pasa Canal di Panama y cu ta finalisa dia 10 di november.
Tocante MS Zuiderdam
MS Zuiderdam ta opera dor di Holland American Line (HAL). E ta e barco lider den Vista class, yama asina pa e uzo extensivo di glas den su superstructura y ta ruman di otro tres barco HAL, esta Oosterdam, Westerdam y Noordam. E prefiho di e nomber di e cuater barconan ta representa e cuater direccion di e compas na Hulandes.
E barco ta comparti dimensionnan exterior similar cu Carnival Cruise Lines y Spirit Class di Costa Cruises. Queen Victoria di Cunard Line ta un version mas grandi di e mesun diseño mescos cu e Signature Class di HAL.
Mescos cu tur e barconan Vista Class, Zuiderdam ta ekipa cu un planta di energia diesel -electrico y un sistema di propulsion Azipod y 85 porciento di su cambernan tin bista pa lama y 67 porciento tin veranda. Su coleccion di arte tin un tema Veneciano den henter e barco. E figuranan mas deslumbrante ta aparece den e epoca di e Carnaval di Venecia, crea pa Daniel Ogier.
E locutor Mericano, Joan Lunden, a batisa Zuiderdam na Port Everglades riba dia 14 di december 2002. Entre october pa april, Zuiderdam ta uza un itinerario den zuid di Caribe cu ta inclui un medio transito via Canal di Panama atrabes di Gatun Locks. For di mei pa september, e barco ta biaha pa Alasca of e region Nor Europeo/Baltico.
E prome barco cu e prefiho “Zuider” a wordo lansa na 1912 como e barco di carga di 5.211 ton Zuiderdijk; e tempo ey “dijk” of “dyk” tabata e suffix uza pa barconan di carga, “dam” tabata uza pa barconan di pasahero. E tabata nabega entre Rotterdam y Savannah, Georgia, pa Holland America te cu 1922, como tambe durante e prome Guera Mundial como transporte.
MS Zuiderdam ta registra na waf di Rotterdam, Hulanda y ta den servicio desde december 2002. E ta midi 291 meter di largura y 32 meter di hanchura y 58 meter di haltura. E tin 11 piso pa pasahero di e total di 15 piso di henter e barco. E ta nabega riba un velocidad maximo dik 24 not of 44 km pa ora y tin capacidad pa carga un maximo di 2272 pasahero y 842 tripulante.
