Crisis Team a informa awe cu, entrante diahuebs awo dia 18 di maart, Aruba lo habri su frontera bek cu Peru mientras cu lo cera pa Sur Africa. Tambe Gobierno di Aruba a dicidi pa mantene frontera cu Brasil y cu Venezuela cera por lo pronto.
Tabata net un aña pasa cu Aruba mester a cera su frontera cu tur pais di mundo cu excepcion di Reino Hulandes, despues cu a detecta cu varios caso di Covid-19 Corona Virus a yega nos isla.
E medida drastico aki, combina cu varios otro medida y regla di comportacion, a haci posibel cu Aruba a controla e pandemia y a limita e impacto grandi cu por tabatin riba nos poblacion.
Gradualmente, durante di e lunanan cu a sigui, a cuminsa habri frontera bek cu diferente pais bao di cierto condicionnan y control.
Despues di a evalua e situacion na Peru, cual a mehora, Gobierno awe por anuncia cu entrante 18 di maart lo habri frontera bek cu e pais Sur Americano. Esey kiermen cu vuelonan directo ida y buelta di Peru of via otro paisnan, cu Aruba ta habri cu nan, por tuma luga atrobe.
