Ayera dia 2 di april, mundialmente ta celebra dia mundial di autismo. Na Aruba no tabata un excepcion. Por a aprecia diferente edificio a uni nan mes cu e color blauw, cu ta e color pa reconoce autismo. No solamente edificionan comercial pero hasta icononan, manera California Lighthouse tabata completamente ilumina den color blauw. Rond mundo a ilumina otro icononan tambe den e mesun color aki. Mundialmente 1 di cada 160 mucha ta diagnostica como autista. Ta uza e dia aki pa conscientisa comunidad tocante autismo. E ta un condicion cu ta afecta e desaroyo di un mucha y mas ainda si tin e sintomanan di por ehempel no ta comunica of papia bon.
Diagnostica for di 2 aña caba
Byron Lesire, ta un hoben autista. A diagnostic’e na momento cu e tabatin 2 aña di edad. Esaki ta relativamente trempan debi cu e edad pa autismo ta di 5 aña bay ariba of hasta un poco mas halto.
“Aruba ta bayendo hopi bon”, ta palabranan di Byron. E ta sinti cu desde cu el e join Fundacion Autismo Aruba, a crea un ‘boost’ pa asina por involucra inclusion den aspecto social, laboral y tambe den educacion.
Proyecto di inclusion
Actualmente tin un proyecto yama pledge for inclusion, di cual varios compania a uni nan mes. E companianan aki a cende luz blauw, entre nan tabatin MetaCorp y Aruba Airport Authority. Pa haya sa mas por subi e pagina di facebook di Fundacion Autismo Aruba.
E mensahe di Byron
Por ultimo, Byron Lesira ta pidi comunidad di Aruba pa ta mas uni. Uni pa cu inclusion, autismo no ta discriminacion. Mas nos comunidad acepta cu nos tin ciudadanonan autista entre nos, mas nos acepta nan, apoya nan y yuda nan, mas uni nos lo biba riba e pida baranca aki.
Historia di dia mundial di conscientisacion di autismo
Autism Spectrum Disorder ta un trastorno di desaroyo caracterisa pa comportacion y afeccion comunicativo cu ta impacta habilidad di un persona pa tin interaccion social y tambe ta causa conductanan repetitivo y restringui. E prome aparencia historico di e palabra “Autismo” a bin na 1911 p’e psikiatra Eugene Bleuler, kende a uza e forma di describi un cluster specifico di sintomanan cu ta considera sintoma simpel di schizophrenia manera retira extremamente social.
