Tur semana santa tur supermercado ta yen. Hendenan gusta busca nan cosnan pa celebra Pasco Grandi. Mas cu claro cu nos ta den un situacion di pandemia y ta trece cu Crisis Team a tuma e decision pa cera comercio riba Bierna Santo, pero tambe riba diadomingo y dialuna di Pasco Grandi, segun Minister di Asuntonan Economico y Finansa, mr. Xiomara Maduro.
Esaki berdad mas hende ta yega na e supermercadonan, vooral esunnan mas grandi, pero bon ta cu ta mira cu tur hende ta tene nan mes na e reglanan. Tur hende tin tapaboca bisti y tambe por observa cu tin distanciamento social. Esey mester tin pa por surpasa e crisis aki door di tene na regla.
Crisis Team ta tuma decision pa bienestar di tur. Berdad ta asina cu comercio a keda un dia cera pero wak kico otro tin den balansa, sino ta bin mas hopi caso. Ya por mira hospital ta yega na su limite. Ta pone e ora cu lo mester bin sea cu ‘Shelter in Place’ of un ‘Lockdown’ pa e pais completo.
Tur e dosnan aki por perhudica comercio mas ainda cu solamente un dia y crea un incomodidad hopi mas grandi cu locual ta un dia cu hende mester para den rij.
Claramente e apelacion ta pa tur hende keda tene na e reglanan di salubridad, e distancia, keda bisti e tapaboca. E ta un dia berdad, pero ta den un situacion di crisis. Si Crisis Team a tuma un decision, pueblo mester obedece!
Sino tin cu recuri na medidanan cu ta hopi mas fuerte cu lo causa mas incomodidad pa loke ta bira pueblo, pero tambe pa comercio en general.
Aworaki no lo por bin cu un shelter in place y tampoco un lockdown. E lo causa sigur hopi mas problema.
Diadomingo di Pasco Grandi como tambe dialuna ta cera, conforme e peticion cu Crisis Team a pidi pa comercio.
