E edificio di Bestuurskantoor ta un monumento inscribi den e registro di monumentonan pa cual no por haci ningun cambio sin e autorisacionnan necesario. Esaki ta loke cu Yvonne Webb, directora di Monumenten Bureau a bisa den un declaracion duna.
El a splica cu na momento cu e Gobierno nobo a sinta, nan a wordo aserca door di e Minister nobo di Infrastructura, Otmar Oduber, kende a pidi pa e oficina aki traha hunto cu DOW pa yega na restaura Bestuurskantoor. E edificio aki ta un monumento registra. E hecho aki a hunga un rol den henter e trabounan.
Monumenten Bureau ta encarga pa traha e plannan pa restauracion di e edificio, percura cu pa loke ta e parti pafo keda den su estado original. DOW lo percura pa e parti paden cu ta encera instalacionnan di coriente y e murayanan di paden. Pero, tur cos mester bay den conhunto pa percura cu e ta mantene su status di monumento y pa cual MF ta revisa tur trabou cu wordo haci.
Sra. Webb a splica cu no ta henter e edificio ta bay wordo restaura na e momentonan aki. Ta bay concentra na e parti di entrada cu ta bay wordo restaura e parti pafo y paden y e resto ta bay wordo haci den fase. Tin hopi trabou pa haci pasobra e edificio tabatin waya di coriente cu ta hopi bieu y mester wordo cambia.
Na mesun momento tin un otro proyecto andando cu ta na banda drechi y cu ta conecta cu Bestuurskantoor y Parlamento. E parti aki no ta cay bou di e categoria monumental. Pa e proyecto aki a tene un destaho caba cu a wordo gana door di un contratista local. E parti destaho Monumenten Bureau no ta encarga cune, pero ta duna conseho con nan tin cu conecta cu e parti monumental, esta kico ta wordo permiti y kico no. Den e parti monumental MB ta envolvi pa prepara e mapanan y DOW a tene e destaho cu a wordo gana door di Van Kessel (pa loke ta e seccion monumental).
E schedule cu a hinca den otro ta mustra cu pa dia 5 di maart ta cuminsa cu e trabounan riba e parti monumental y e fondo pa financiamento di e proyecto ta bini di DOW y ta poni riba presupuesto. E proyecto aki total ta bay costa rond di 4 miyon florin. Segun sra. Webb, e tempo tabata hopi cortico pa traha riba e proyecto aki y ainda ta haciendo investigacion riba e verf original di e edificio.
