E homber Jairo Ch. di 47 aña tabata mustra masha trankil na momento cu el a presenta dilanti Corte diabierna mainta acusa entre otro di asesinato.
Jairo ta envolvi den e caso conoci cerca autoridadnan como caso FIST cu ta e asesinato cu a tuma luga dia 3 di november 2017 den un cas na de Vuyst y unda e victima tabata e hoben Sarahi Sierra di 19 aña.
E mainta a cuminsa cu Fiscal presentando e acusacionnan contra Jairo cualnan ta: intencionalmente tuma bida di un persona riba 3 di november 2017, dor di choke, stik’e, hink’e cu un obheto skerpi y/of dal’e cu un obheto stompi. E violacion di e persona, secuestro y/of ladronicia di un suma di placa cu tabata mas o menos 1100 florin, tabatin como consecuencia e asesinato.
“Mi ta pidi pa e caso aki wordo posponi comokiera cu e resultadonan di e investigacionnan tecnico haci door di Instituto Forensico Nacional di Hulanda” (NFI) no a keda cla ainda. Por lo menos, nos no a haya nada ainda,” Fiscal a bisa inmediatamente despues di presenta e acusacionnan. El a splica cu esaki ta e motibo cu tratamento no por tuma luga.
Abogado mr. Iles, kende a representa e acusado Jairo Ch., a bisa cu su cliente pa scucha tres testigo. Ta trata aki e muher AV y RY, kendenan ta biba na Tarabana y kendenan lo por duna un alabi di unda su cliente tabata e dia di e asesinato di De Vuyst. Y tambe el a pidi pa tuma declaracion di e ruman muhe di e victima, esta e mucha muhe SS, riba algun punto y entre otro e relacion intimo.
Tabatin diferente miembro di famia y ex pareha di e victima presente. Hues a puntra si tin algun hende cu lo kier entrega un demanda pa daño y perhuicio pero niun hende no a contesta. Despues el a puntra esaki specificamente na e mama, kende a contesta: “Pakico un demanda? Mi no ta haya mi yiu bek toch”
Hues a bay di acuerdo cu tur e peticionnan aki. E testigonan lo wordo scucha door di Hues Comisario.
E caso aki ta unda e victima ta e hoben mama Sarahi Sierra a causa hopi consternacion. E victima tabata un hoben studiante y mama di apenas 19 aña cu a laga un yiu chikito atras.
E hecho a tuma luga riba un diabierna mainta, ora cu e ruman di e victima a yega cas den oranan di merdia, el a wordo confronta cu un escena cu hamas e lo lubida. El a haya su ruman muhe den baño, sin paña y no ta duna señal di bida. E informe ta bisa cu e tabatin un saco riba su cabes, indicando cu el a wordo gestik y esey ta para den e acusacion tambe.
E acusado mes diabierna mainta no a bisa nada den e mas o menos 10 minuut cu e tabata sinta dilanti di e mesa berde cu e Hues su dilanti y famia di e victima sinta su tras.
