Un mucha muhe di apenas 27 aña di edad a perde su bida despues cu tiro a alcans’e den cura di su cas na Pos Chikito awe marduga. E vocero di polis, Liliana Rasmijn, a confirma cu dos mucha menor di edad tambe tabata den e cas na momento di e sucedido. Altocomisario di Cuerpo Policial Aruba, drs. Ramon Arnhem, a condena e crimen y a sigura cu polis ta tuma e investigacion cu hopi seriedad.
Segun Rasmijn, pa mas o menos 3:10 di marduga Central di Polis a ricibi un yamada pa un persona cu a haya herida di bala y no tabata reaccionando. E prome aviso tabata menciona un homber, pero ora e patruyanan a yega na sitio, nan a topa un hende muhe na suela den cura di su cas.
Polis y ambulance a acudi na e adres. Paramediconan a haci tur esfuerso pa salba bida di e victima, pero lamentablemente dokter forensico a constata morto di Diviene Celine Lillian Vlaun naci na Aruba dia 12 di mei 1999, pues tabatin apenas 27 aña di edad.
Rasmijn a indica cu e prome informacion ta menciona un auto color scur relaciona cu e sucedido. Sinembargo, polis ainda no a confirma e marca of modelo di e vehiculo, ni cuanto persona tabata aden. Tampoco tabatin confirmacion di cuanto bala a alcansa e victima. E mama di e victima a bisa recherche cu el a scucha cuater diferente tiro!
Recherche, polis tecnico y e dokter forensico a inicia nan trabou na sitio pa determina exactamente con e crimen a sosode. Investigadornan tambe ta papia cu testigonan den e vecindario. Rasmijn no a confirma un posibel motibo ni si tabatin algun problema previo relaciona cu e victima.
E vocero a confirma cu dos mucha chikito, ambos menor di edad, tabata presente den e cas. E no a duna mas detaye tocante nan.
Rasmijn a califica e sucedido como hopi lamentabel y inaceptabel. El a haci referencia tambe na un otro caso reciente na Caya Sint Maarten, unda dos persona a haya herida di bala, sin establece un relacion entre ambos caso. Na nomber di polis, el a expresa condolencia na famia di e victima.
Di cuater asesinato
E caso lamentabel di diasabra marduga ta marca e di cuater caso di asesinato pa e aña aki. E prome tabata e asesinato na The Village den area di hotelnan highrise. E di dos tabata e caso na Calabas. E di tres asesinato a sosode riba veld di Winston na Santa Cruz. E di cuater ta esun aki awo na Pos Chikito.
Mama: “No sa kico el a bay busca pafo”
E victima ta biba cu su dos babynan na cas di su mama den e casnan di pueblo na Pos Chikito. E mama a relata cu dado momento un di e babynan a lanta yora, pa cual su yiu a lanta pa traha un boter p’e. Despues el a sinti e yiu habri e porta di cas y a bay pafo y den cinco minuut a scucha tiro. Ora a sali pafo no a mira nada mas cu su yiu benta banda di e auto di e mama den un plas di sanger. Pa colmo e yiunan a lanta pues a mira nan mama morto na suela, pa cual a traslada nan pa cas di un famia.
Arnhem: polis ta tuma e crimen hopi na serio
Den su reaccion, altocomisario drs. Ramon Arnhem a subraya cu e investigacion a cuminsa mesora y cu coleganan ta traha tanto na e sitio di e crimen como na otro lugarnan relaciona cu e investigacion.
Arnhem a califica e crimen como inaceptabel y a sigura cu polis lo actua cu firmesa pa localisa esnan responsabel. El a enfatisa cu Cuerpo Policial Aruba ta presente 24 ora pa dia, shete dia pa siman, cu e tarea di proteha tur hende.
E altocomisario a pidi comunidad pa colabora cu e investigacion. Cualkier persona cu tin un tip of informacion cu por yuda polis por comparti esaki via e tiplijn.
Rasmijn tambe a haci un apelacion directo na esnan cu a mira of tende algo relaciona cu e sucedido pa yama 11141. Hende cu aporta informacion via e tiplijn ta keda anonimo.
