A transcuri un aña cu husticia a pone man riba un comerciante local cu tin un compania courier, manera ‘fedex’, cual ta specilisa den transporta oro.
Na luna di Febuari 2018, grens politie, hunto cu recherche Hulandes di RST a haya ta bon pa confisca un cargacion di oro na aeropuerto.
Un homber cual ta wordo yama ‘pasahero courier’ a yega Aruba cu un maletin di oro y a informa Aduana mesora di esaki.
Ya desde algun dia prome, a sigui tur instruccion aduanal y a regla tur papel pa un ‘door-voer’.
Pues aki ta trata un oro cu no ta destina pa drenta Aruba, pero pasa solamente di transito.
No tin ningun ley cu ta prohibi e transporte aki.
Sinembargo, pa falta di conocemento, of pa malicia, RST a drenta un spiral di pensamentonan robes, cu te awe nan no por saca nan curpa afo.
Ministerio Publico tin mas di un aña ta haci tur sorto di investigacion.
Nan a scirbi tur autoridad mundial pa asina purba na haya algo robes cu e legalidad di e oronan aki.
For di Venezuela, tur cos ta na orden, pasobra e compania tin su permiso di Gobierno pa traha den nan mina.
For di Merca tampoco por a haya nada.
For di Hulanda a drenta solamente poco redashi sin base, pasobra mas peor, un servicio di inteligencia Hulandes a bruha, y a bisa cu den freezone e oro ta wordo rafina.
Tur esakinan ta locura, pasobra e carga di oro di Febuari 2018, ta destina como transito y nunca a wordo saca y drenta Aruba.
Mas intresante ta cu e compania courier, asabiendas cu e no ta haciendo nada ilegal, a sigui su trabao y na September 2018, a bolbe busca oro for di Venezuela, pasa via Aruba, sin ningun obhecion!!! y sigui pa Amsterdam, pasa tur papeleria corecto y sigui pa Belgica unda finalmente e oro a wordo entrega na e compania cu ta bay procesa e oro.
E compania courier di Aruba awor ta perhudica cu un caso supuestamente criminal, unda e ordo a keda confisca, sin ningun sorto di hustificacion.
Ministerio Publico a bolbe haya algun siman mas pa sigui investiga y wak si nan por haya algo robes.
Te cu awe, un aña despues, no tin absolutamente nada riba e caso aki.
Mas cu claro, mester enfatisa cu e oro aki ta legal, sinembargo eyfo por tin otro personanan cu ta dedica na haci negoshi di oro ilegal, kisas mescos cu koper. Pero den e caso di e courier registra na Aruba, nan transporte semper ta totalmente legal.
Pues kisas Ministerio Publico, RST a tende algo, pero no sa ta kico.
