Tin diferente cos cu a ripara ultimo temponan aki cu e situacion di Venezuela. Ora cu e refugiadonan aplica na DIMAS por ehempel, mesora ta duna nan manera un tipo di status legal pa por move riba e isla pa algun siman, depende cuando tarda pa nan haya un contesta.
A haya un situacion cu nan ta cambia adres tambe, pasobra ya caba sa unda nan ta biba y ta dicidi cambia di adres mesora. A base di esey ta duna un derecho pa keda pendiente pa un contesta. Riba esaki Minister Andin Bikker a splica cu no ta asina. Si bo aplica ora bo ta na Aruba caba, bo no ta bin na remarca pa articulo 19. Si bo yega na aeropuerto of un waf registra cu a aplica, e ora bo ta bin na remarca. Awor aki, e 133 personanan cu a aplica nan no ta bin na remarca pa ningun tipo di permiso. Diligente a dicidi cu probablemente hasta, pro forma, cu no ta ni tuma nan den tratamento, pasobra nan no ta bin na remarca bao di nos leynan vigente.
Tin un proceso prescribi pa esnan cu ta bin na remarca pa aplica. Esnan cu a aplica door di e mal entendimento, nan a entrega aplicacion. Nos constitucion ta bisa, cu bo tin un petitierecht. Un persona mag di aplica. Como gobierno bo ta tuma e aplicacion, pero esey no ta nifica cu e ta haya derecho. Por tum’e y despues neng’e mesora. No ta dun’e ningun tipo di derecho. E 133 personanan aki cu a aplica, no tin ningun derecho, pa e simpel hecho cu e aplicacion a wordo acepta.
