Segun sra Arends-Reyes Parlamento a ricibi diferente documento digital y ora cu repasa diferente di esakinan, tin diferente informacion cu ta valioso pa asina nos comunidad por ta na altura di tur desaroyo tambe den e industria turistico di nos isla.
Parlamentario Jennifer Arends- Reyes di fraccion di AVP ta mustra cu si por wak por ehempel e parti di ATA, cu a entrega hunto cu AHATA e boletin mensual di Juni 2018, tin un parti caminda nan a haci un analisis bou e titular “Local Sentiment Analysis” cu ta locual cu nan ta puntra localnan despues di un temporada, pa asina por midi kico ta e sentimento di hendenan local y tambe separa un di turistanan cu ta bishita nos isla.
“Si nos wak por ehempel e parti di nos hendenan local cu a wordo presenta den e boletin, e punto principal cu ta esun general, si compara esaki c’un grafico cu ta data di 2005, por mira cu e parti di economia ta esun mas importante caminda esaki ta 52% mas cu e parti social, cu ta e bienestar social, cu ta 48%.
Na aña 2018 por mira un cambio caminda 40% e pueblo di Aruba ta bisa cu e parti di economia ta sumamente importante pero por observa tambe cu tin mas conscientisacion con e pueblo di Aruba tambe tin cu beneficia di nos turismo y con nan ta sinti nan bienestar general den esaki.
Esaki ta confirma tambe locual cu partido AVP den gobeirno tambe a haci, den e sentido cu por wak cu tabatin dos banda caminda un a scoge cu e parti di economia ta sumamente importante y for di cual por conclui cu Aruba su economia ta draai riba turismo y tur negoshi cu ta habri y turismo ta interconecta cu otro.
Esey tin di haber cu trabou, e parti laboral, kico ta e beneficionan pero tmbe e parti caminda cu partido AVP semper a enfoca riba dje, cu tabata e parti caminda pueblo di Aruba tambe tin cu beneficia di e nos turismo.
Entro otro por mira e parti di Linearpark cu e bienestar social caminda por tuma nota cu famianan ta hasi uzo di dje mescos cu nos beachnan, por pasa tempo hunto y ta loke cu partido AVP semper a considera importante, esta cu e desaroyo economico mester beneficia tambe e aspecto social.
Igualmente den barionan, con nos ta biba cu otro y upgrading di e infrastructura.
Esaki ta confirma tambe e ‘twee sporen beleid’ tanto pa tene bon consideracion cu e parti social, bienestar di nos pueblo, hunto cu e parti economico.
Si nos wak e parti di acomodacion di e boletin den luna di juni, por mira diferente cifra y un di nan sigur ta remarcabel cu ta e aumento di personanan cu ta kedando na e ‘lowrise hotels’ cu a aumenta cu 11.9% y tambe ‘other accomodations’ tambe cu 10% cu ta un aumento significante compara cu otro porcentahenan di unda nan ta hospedando.
Pues aki por ripara cu e tipo di turistanan cu ta yegando Aruba, tambe ta exigi mas desaroyo, no solamente den a parti di ‘highrise hotels’ pero tambe den e parti di ‘lowrise hotels,’ cu ta mas den centro di ciudad.
Si nos wak e otro aspecto presenta den e boletin, cu ta e sentimento di turistanan, kico nan mes ta experencia na Aruba, nos a score bon pero si wak un punto cu nan a remarca na luna di juni 2018, caminda na luna di juni ainda nos no a conoce e aumento di impuesto di parti di gobierno, asina mes 23% di turistanan kendenan a wordo entrevista, tin remarcanan cu a resalta na varios ocasion cu turistanan a bisa literalmente, cu “e unico cos cu nos no a gusta di Aruba, ta cu tur cos ta masha caro mes.”
Otro a bisa cu “tur cos ta caro,” y asina por sigui wak mas comentarionan tipo di ramarcanan cu a wordo duna nos mester tuma na consideracion e pensamentonan aki di turistanan cu ta bishita nos isla.
Ya cu na momento cu nan ta bisa cu nos ta cobrando hopi pa un servicio, mester percura e ora pa e producto ta na nivel di e placa cu nan ta pagando, esta e calidad mester tin e balor cu nan ta ricibi ‘value for their money’. Mescos cu por bisa pa pueblo di Aruba en general cu a haña un aumento di impuesto cu ta cumulativo sin un reforma fiscal. Pues ta pagando hopi na caha di gobierno pa efecto supuestamente ‘trickle down’ back pa comunidad, pero esey ta locual netamente a bai hopi atras, hopi servicio y facilidadnan ta bayendo atras, ta parce cu e hende no ta central.
Sin duda aspectonan importante pa Aruba sigui concentra riba dj’e, esta cu e servicio y facilidadnan mester ta di mesun calidad halto cu e prijs ta wordo cobra,” Parlamentario di fraccion di AVP, Jennifer Arends- Reyes a trece dilanti.
