Diabierna anochi a tuma luga un evento di bolas. E team di King & Queen Bee’s Bolas y Tiro Loko Bolas a uni hunto pa organisa un evento na Centro di Bario y Deporte Dakota. E evento tabata uno special mirando cu ta despues di hopi aña ta organisa un evento di bolas bek na Centro di Bario y Deporte Dakota.
Gina Tromp ta forma parti di e comision organisado. E evento a conta cu gruponan mixto, pues sea dos hende homber y dos hende muhe of tres hende muhe y un hende homber. Bolas no ta un deporte popular, pa cual ta haciendo nan esfuerso pa mantene na bida y organisa mas hopi torneo cu ta posibel. Un di e motibonan principal pakico ta organisa torneo di bolas tambe ta pa; recauda fondo pa por representa Aruba den evento internacional.
Tromp a subraya e importancia di tin un team cu ta sostene y traha hunto den organisamento di torneo. E proximo evento internacional lo ta na september proximo, caminda cu varios team di Aruba lo participa tambe hunto cu e teamnan di Corsou, Boneiro y Venezuela.
