Despues di a reuni cu Minister Ursell Arends riba e situacion di Arubus, representante di SEPPA a acerca e trahadonan pa duna informacion di e reunion. E sindicato a pone na mesa nan proposicion y un biaha Raad Comisaris di Arubus a bay reuni pa asina duna un contesta awe ainda. Ta depende di e contesta cu e trahadonan ricibi ta dicidi si ta stop di manifesta of no.
E trahadonan ta den welga te cu mañan mainta, esta 8:00 am, pero esaki ta depende di loke bin padilanti, no ta descarta cu e posibilidad cu ta drenta den un welga definitivo. SEPPA a mustra tanto na minister como Raad, mirando cu diaranson ya caba a tene un reunion cu Raad, cu esaki ta un otro posicion pa tin un reflexion riba loke ta andando. E trahadonan no ta acepta cu ta impone un structura salarial cu no ta refleha nan derechonan y perspectiva di careda cu nan tabatin anteriormente.
Esaki ta perhudica nan pa loke tabatin caba. Secretario general di SEPPA, Magaly Brito, a sigui indica cu despues di hopi deliberacion tanto Raad como e minister a bay reuni un rato. Pero SEPPA mes a sinta na banda pa delibera e posibilidadnan pa por yega na un acuerdo. Peticion di mediador tabata pa yega na un acuerdo cu otro y asina termina e impasse cu ta aden.
Mediador y Raad a indica cu nan ta den reunion cu gerencia pa mira e posibilidadnan. Di banda di SEPPA y e trahadonan, nan tambe ta dispuesto di termina cu e conflicto den termino hopi corto. P’e motibo aki nan tambe tin proposicion, pero ta pendiente kico gerencia y Raad di Arubus ta bay bin cu ne.
Pa mas lesa TREMPAN.COM.
