Durante un conferencia di prensa cu a tuma luga dialuna mainta prome minister, Evelyn Wever-Croes a duna un relato pa loke ta e cifranan pa luna di januari y tambe e medidanan tuma ultimamente.
El a splica cu e prome luna di aña tabata bastante preocupante, a drenta e di tres ola, cu 281 caso y cierto momento den medio di januari 624 caso. A cera e luna cu 342 caso activo. Hasta a constata e variante Ingles na Aruba dia 25 di januari.
Tin dos indicador pa loke ta e situacion actual. E prome indicador ta cantidad di caso nobo pa dia awo ta na 35 caso nobo pa dia. A pesar cu esaki ta menos, e ta keda preocupante. Di dos indicador ta e cantidad di pashentnan den hospital. Actualmente tin 18 persona den hospital. Pa loke ta e ocupacion di Intensive Care, esaki ta uno di preocupa. El a cuminsa na 2 pashent y a hisa te na 12 y na e momentonan aki tin 10 persona interna.
Tambe el a splica cu a haci mas di 20 mil test. Den januari 10 persona a fayece di COVID-19. Solamente na lunanan di september y october a mira cifra mas halto cu esaki. Den januari a aplica regla di orden publico extra, entre otro Toque de Queda. A prolonga e medidanan mientrastanto cu un siman pa tin un miho bista, specialmente ora ta papia di e variante Ingles. Despues di awe sa miho con e bista ta di e variante Ingles.
E desaroyonan den januari a causa reto y preocupacion. Esaki a pone cu a trece costo adicional. “Ttin cu bisa cu danki na frontliners por a logra mantene e plamamento di e virus na un minimo. Danki na e ciudadanonan cu a sa di mantene nan mes den gran mayoria na e protocolnan.”
Pero, e mandatario a splica cu ningun hende mester lubida cu e virus t’ey ainda. P’esey mester “sigui cuida te ora cu logra vacuna gran parti di nos comunidad. Ningun hende ta obliga pa tuma vacuna, pero si ta conseha pa tum’e.”.
E mandatario ta enfatisa cu lo sigui monitor situacion di COVID y si tin cambio riba medida lo informa riba esaki. Ta apela na pueblo pa cuida nan mes y esnan cu bo ta stima. “COVID ta un enemigo invisibel y cruel cu a bay cu 59 bida. Awo ta keda na nos pa evita cu e ta sigui plama.”
