Despues di dies aña trahando cu e compania Mericano ‘the Concept Farm’ den desaroyo di promocionnan (advertising), Aruba Tourism Authority (A.T.A.) a anuncia cu a yega ora pa despedi y a gradici nan pa un trayectoria bunita y remarcabel. E trayectoria di e compania estableci na New York a inicia na juni 2012 cu e meta pa desaroya promocionnan unico y inigualabel pa asina hiba e nomber di Aruba padilanti como un di e destinacionnan preferi y reconoci den Caribe.
The Concept Farm, lidera pa Gregg Wasiak, a sa di destaca den exterior desde e inicio di nan prome campaña “Return to Happiness” te na final cu nan ultimo campaña “Your Happy Place”. Hunto cu A.T.A. a gana un total di 45 premio HSMAI Adrian Awards y un premio EFFIE, pues sigur algo di aplaudi.
Aruba Tourism Authority ta gradici Gregg Wasiak pa e confiansa y e trabou duro cu el a brinda nos pa Aruba por luci den exterior. Gregg a traha cu hopi pasion, lagando su famia atras na varios ocasion pa ta presente na Aruba y asina traha riba diferente campaña extraordinario. Incluyendo durante e pandemia, Gregg y su ekipo a para cla y firme pa por mantene nomber di Aruba na halto pa medio di diferente promocionnan cu mensahenan clave di virtud. Gregg a yega Aruba como un socio y ta bay bek como un gran amigo y famia.
A.T.A. ta traha cu diferente agencia na Merca pa diferente trabou cu ta rekeri experticio specifico. Te cu awo ta traha cu 3 agencia, un pa ‘PR’, un pa desaroyo di promocion y un otro pa ‘media buy/placement’, esta colocacion di e promocion den canalnan (media) debido na e manera mas bentahoso y efectivo cu ta posibel. Aña pasa a contrata e compania ‘Engine’, cu a reemplasa un otro agencia encarga cu e disciplina di ‘media buy/placement’. Actualmente ta evaluando un reemplasante pa the Concept Farm.
A.T.A. un bes mas ta gracidi the Concept Farm, pa e dies añanan di dedicacion profundo na e desaroyo di promocionnan pa Aruba, y asina ta clausura un etapa bunita, en espera di e inicio di un trayectoria nobo cu e ekipo reemplasante.
