Awe a inicia cu e proyecto di Fiesta di San Juan/Dera Gai y lo core pa 2 siman consecutivo. Uno ta di 8’or y mey pa 10’or di mainta y e otro ta di 10’or y mey di mainta pa 12’or di merdia, segun John Fleming di e Departamento di Cultura.
E ta sigui splica cu cada scol cu bin, ta yena e sala, mas of menos 500 mucha. Lo bay conclui riba un total di 4000 mucha cu lo bishita e evento aki. E evento aki semper departmento di cultura tabata tin’e den diferente forma. Antes tabata bishita scolnan rond di Aruba. Tabata bay den bario y den e ultimo tres añanan, nan ta bay Cas di Cultura, unda cu ta presencia esaki den un show.
Ta trece storia y ta haci’e den estilo di un obra pa e muchanan. E hobennan ta sumamente contento y gradicido di e informacion cu nan ta haya. Ta enfoca mas riba e hobencut, basisschool y kleuternan, pa e motibo cu ta inculca e cultura den e muchanan y asina nan por tin mas balor pa nos cultura di San Juan. San Juan ta un di e fiestanan mas grandi cu nos ta celebra na Aruba y e ta un dia di celebracion cu tin asina hopi aña cu e ta celebra na Aruba. Ta un tradicion grandisimo. Por bisa cu e aña aki dia 24 di Juni e ta bay riba un diadomingo. No ta mira un motibo pakico pueblo di Aruba sali y celebra fiesta di San Juan.
Mirando e proyectonan aki por bisa cu e ta bin full di parti di Departamento di cultura, hunto cu ministerio di Cultura y ta presenta esaki. E ta cuminsa awe, dia 12 y ta finalisa dia 22 di Juni. Pueblo di Aruba tambe tin chens bin. De bes en cuando por tin 10, 12 of hast 15 stoel cu ta liber. No por priminti cu ta pa publico sino pa muchanan di scol.
Ta hopi satisfecho riba e acogida cu aña tras aña e scolnan ta yama for di tempran pa por participa na e evento aki.
Den e mesun rosea Flemming, como presidente di comision celebracion Dianan Nacional, ta invita y ta pidi tur club y centronan di bario cu ta celebr dia di San Juan pa haci peticion na Departmento di Cultura tempran, pa tanto e subsidio y tambe pa ayudo di baricada, tent of otro cosnan cu tin cu pidi DOW, pa haci esaki mas tempran posibel. Por haci esaki via telefon of bin personalmente na Departamento di Cultura, puntra pa Marlene Lampe of un funcionario di e seccion implementacion y nan lo sa di atendebo cu esakinan.
No ta conta storia so
Durante e evento no ta conta storia so, pero ta laga e muchanan participa den e evento, tanto den baile di San Juan como otro cosnan. Añanan anterior a yega di traha un pakete, unda cu a regla cada scol un caha cu material di e fiesta di San Juan. Nan a haya un gai, nan a haya palo di mata e gai, lenso pa mara wowo. A parti e banderanan pa nan hunga e wega di rancamento di bander y un CD cu e cantica di San Juan. Awe por mira con nan a siña esaki na scol y nan a bin competi den e competencia. Tur aña ta haci algo diferente, y ora nan yama, ta pidi pa nan competi den tanto bailamento, rancamento di bandera, grito di gai, etc. E muchanan sa caba con e programa ta den otro. E aña aki por bisa cu ta traha hunto cu brandweer. Nan tabata tey presenta pa duna un splicacion di e peliger di candela.
No ta en contra di kimamento di sushi. Antes e bieunan tabata kima e resto di cosecha. E resto ta e resto di maishi, rama di bonchi, rama di comcomber, rama di patia. Awendia awa no ta yobe mucho mas. Antes nan tabata spera riba e awa di Juli, cu ta yobe sigur y ta caminda nan ta prepara nan cunucu. Awo nan ta kima taira, bateria di auto, stoelnan di plastic y diferente cos. Tur esaki ta contene kimiconan cu ta dañino pa nos salud. Pesey ta concientisa pa no kima cosnan cu ta dañino pa salud di hende. Mirando cu e casnan awor aki ta un riba otro, unda cu un chispa por bula y kima e otro cas.
Aña pasa a prepara un poppenkast mescos cu e aña anterior, pa motibo cu e scolnan a gusta esaki. Ta trata di un storia di pasado con e hendenan tabata biba, con nan tabata comparti. Despues ta yega na e final cu tur e combersacion ta yega pa prepara e fiesta di San Juan. E ora nan ta bay bisti etc. Brandweer aki tambe tabata den y otro instancianan.
E aña aki Biblioteca lo tey, den representacion di Richard Dabien kende ta bin conta storia.
Asina eynan cada aña ta trece un variedad aden cu e muchanan ta gusta. Nan ta gusta e musica, ta gusta baila. Tin e gai y tin e wantoba. Ta splica nan kico ta e funcion di wantomba tambe den e fiesta di San Juan y tambe den e cunucu. E muchanan ta hopi interesa. Por bisa tambe cu durante aña, Flemming ta topa cu muchanan cu tabata chikito y despues a bira grandi, nan tabata traha proyectonan di scol basa riba San Juan y nan ta bin busca informacion na Departmento di Cultura.
