Un guera cu tin lunanan caba andando pa ta den directiva di Aruba Nautical Club a percura pa un division pisa eyden, intriga, pleitamento y midimento di forsa entre diferente grupo entre miembronan di e club social. Un luga cu hende ta para nan boto pa topa, pa pisca y pa bebe un cerbes, a para bira un luga di guera. Siman pasa Corte a para e guera aki y a ordena pa por lo menos un di esunnan cu ta considera di ta instiga eyden, cu e por saca su boto y “baha na awa”.
Den un sentencia di dia 22 di december ultimo, hues mr. A. Van den Leur a dicta fayo den e caso cu Hendrik Marsman a entama contra Aruba Nautical Club. Marsman tabata representa den corte pa abogado mr. Glendeline “Lalo” Croes mientras cu Aruba Nautical Club a conta cu sosten di abogado mr. David Kock. E caso a cuminsa na november caba pero dia 16 di december ultimo a tuma luga e caso fisico den salad di corte.
Loading…
Reload document 
Open in new tab E sentencia
Hues a dicidi den e caso sumario pa rechasa e peticion di Marsman. A conden’e na paga e gastonan di e caso balora na Afl. 1750,=. Tambe a ordena Hendrik Marsman pa, dentro di 14 dia, e saca su boto for di Aruba Nautical Club y cu por lo pronto e ni su boto no ta bonbini mas na e club. Den caso cu Marsman no cumpli cu e sentencia, a impone un dwangsom di 500 florin pa cada dia of parti di dia cu e no cumpli, te na un maximo di Afl. 250.000,=.
Pa mas informacion y detaye, lesa e edicion di TREMPAN di awe.
