Recientemente a tuma luga na The Ritz Carlton Aruba e conferencia organisa pa di 4 biaha pa Banco Central Aruba riba e tema di innovacion, ‘4th Annual Future of Innovation Conference’. Presente na e conferencia tawata bishitantenan di Merca, Hulanda y Trinidad & Tobago.
Mr. Ryan Peterson, Gerente di Maneho Economico na Banco Central di Aruba, a splica cu e tema central tabata innovacion. Tempo ta cambiando, y innovacion ta algo hopi importante pa paisnan y cada aña ta un otro tema. E biaha aki a papia, discuti y presenta temanan riba un economia circular, cu aspectonan hopi importante pa Aruba.
Por ehempel ta papiando di cambionan climatologico, bo ta papiando cu e temperatura di lama ta subiendo. E no ta subi cu 10 grado, pero ora cu e temperatura cambia di 1.3 pa 1.5 grado obviamente bo lo nota cu coralnan ta muri, etc. E profesional ta sigui splica cu por a ripara cu den e ultimo 50 añanan, e frecuencia di e horcannan, cu no ta dal Aruba directamente, pero ta pasa banda di nos, toch ta birando mas. Ta mira e inundacionnan cu ta frecuenta mas y mas riba nos isla.
Tambe tin un otro tema, cual ta waste-management, cu ta un tema hopi importante. Cincuenta aña pasa e poblacion no tabata hopi, pero awendia nos ta papiando di 120 mil habitante y 2 miyon di turista, cu indirectamente ta aporta na e desperdicio ey. Desperdicio su problema ta con pa anda cun’e. E landfill no ta algo sostenibel, ya cu esey tambe ta aporta basicamente na e calidad inferior di lama, a costo di e bida marino.
Otro tema cu a discuti ta infrastructura. E edificio, careteranan, di ki manera por traha nan di forma circular y eficiente sin mucho recurso y cu e recursonan ey ta caba den nos medio ambiente y finalmente no kibra nos medio ambiente.
Ta diferente tema cu a discuti. Tabata tin diferente orador local y internacional. Hendenan di IMF, di Europa, Hulanda, Colombia y diferente localnan cu tambe a aporta na e tema aki pa asina empuha un economia mas circular, mas sostenibel unda bo ta wak di un banda e parti di haci menos daño na medio ambiente, uza menos recurso. Of di otro banda, no tira bo sushi afo sin pensa kico por haci cu e wasmachine, of e frigidaire, of un celular.
“Hopi di nos tin nos celular y cada 6, 7 of 8 luna ta cumpra uno nobo. Awo e pregunta ta unda esun bieu ta bay. Bo ta tir’e afo? Tin luga cu ta refurbish bo celular? Y kisas bende tambe? Tin hopi oportunidad pa empresarionan na Aruba pa cuminsa pensa riba e oportunidadnan cu tin pa crea negoshi nobo.”
Hopi biaha no ta pensa riba un economia circular, manera bahamento di gasto. Energia renovabel ta mas barata a largo plaso. Pero tin oportunidad pa negoshinan nobo tambe.
Tabata tin hopi empresario hoben durante e conferencia na Ritz Carlton, cu ta buscando e oportunidad ey pa wak ki business model tin, kico ta e business case, unda por aporta na esaki. Ta un grupo hopi diverso. Tabata tin presentacion di e presidente di Banco Central. Despues prome minister a duna su vision pa Aruba pa loke ta e tema di economia circular. Y un apoyo hopi fuerte pa esey tambe di banda di gobierno. Despues diferente otro instancia, IMF, Nacionnan Uni, un entrepeneur di Hulanda mes, y asina por keda menciona.
Economia circular no ta solamente finansas y negoshi, sino tambe con bo ta enforsa ley, ki sorto di cambio tin den leynan fiscal cu mester bin pa stimula un economia circular.
