Sindicatonan SADA, cu ta represente Duaneronan di nos isla y nan miembronan a keda contento cu Ministernan di Finanza y Husticia a atende nan apesar cu nan tabata den reunion di Conseho di Minister (tur diabierna). Na final a palabra un fecha riba cual e partidonan ta bini hunto pa atende cu e preocupacion di miembronan di SADA.
“E hecho cu Ministernan Ruiz-Maduro y Bikker a schors nan reunion den Ministerraad, pa miembronan di sindicato SADA, tabata un situacion hopi positivo. E reunion mes entre SADA y e ministernan a bay den bon esfera,” presidente di e sindicato Edward Maduro a bisa.
Locual cu a informa e sindicato, pa loke ta e disgusto di e trahadonan pa cu “salarishuis”, a haya un claridad. Tin un reunion cu nan atrobe dia 2 di september. E reunion aki ta di vital importancia, pasobra e ora por bisa por fin a haya un fecha pa ki dia por keda cla cu e asuntonan di e miembronan di SADA.
Segun Maduro, e parti cu a pone cu cosnan a tranca, no ta debi na e gobierno riba su mes, pero ta e falta di seriedad y e falta di incompetencia di parti di DRH. No por t’asina cu e Departamento di Recurso Humano, cu tabata envolvi den full e proceso di e convenio cu a firma na 2017, di repente ora cu ta den cla, a manda un conseho negativo.
A bolbe bisa nan cu DRH mester haya un brevet van onvermogen. No por t’asina cu ta duna un proposicion, unda cu Sindicato SADA a entrega su deseonan pa locual ta trata structura salarial, y DRH, como conseheronan di gobierno, a bisa gobierno cu e proposicion di e sindicato ta mucho halto, y cu esaki no ta factibel. “Laga DRH bin cu un conseho of proposicion, pero den e caso aki ta SADA a duna un proposicion. Eynan ta caminda cu SADA ta bisa cu tin cu duna nan un brevet van onvermogen. Bo ta haya un dikke onvoldoende, pasobra no por duna un proposicion awe y mañan bo ta bisa cu loke a duna nan ta malo. E cos aki sea ta haci’e a proposito pa alarga esaki.”
E ministernan a duna nan comprension total pa loke e trahadonan di Aduana ta pasando aden y ta algo hopi positivo y a cay den bon tera cerca e miembronan.
Pa e parti aki SADA lo sinta dia 2 di september den oranan di atardi cu Prome Minister, Minister di Finansas y esun di Husticia, como tambe e Departamento di Wetgeving y DRH, hunto cu mediador. Tur esakinan relaciona cu ehecucion di e salarisstructuur nobo.
E miembronan di SADA a keda hopi satisfecho. Tabata tin mas informacion, segun e presidente di SADA, cu ta mustra cu DRH ta keda haci y deshaci manera cu ta nan ta gobierno y nan ta dicidi. Tur e cosnan aki ta cosnan cu a señala na minister y ta inaceptabel, esta cu un departamento cu no ta sigui e tarea di e minister riba otro temanan cu ta regarda Aduana. Minister ta duna un opdracht y asina mes, ta haci otro contra locual e minister ta bisa pa haci.
Segun Maduro, a bisa e minister cu mester tuma medidanan cu DRH. “No por t’asina cu bo hefe, bo doño di trabao ta dunabo un opdracht y abo riba bo mes, ta bay haci y deshaci cu ta pone mester bay corte, pa corte bati riba bo dedenan. Bo ta haci cosnan sin permiso di minister. E cos aki ta tumando luga no solamente den Aduana, pero tin di compronde for di e otro sindicatonan cu tin representacion den e sector publico, tambe ta bibando e cosnan aki, cu DRH ta haci y deshaci manera ta haya ta bon, hincando gobierno den un situacion no mucho positivo.”
A haya claridad di varios punto. Pero pa loke ta trata salarishuis, nan ta riba un bon caminda. E parti cu ta bon ta cu e Ministernan a compronde loke e trahadonan ta pasando den dje. Awor aki ta keda en espera pa e reunion di dia 2 di september proximo.
