Ni den gym no ta scapa: A horta Rolex for di “treadmill”

75

Diamars ultimo un cliente di MyFitness Gym na Santa Cruz a pasa den un experiencia masha desagradabel ora cu un ladron a bay cu su holoshi caro marca Rolex. Manera ta conoci, e marca di holoshi ta uno masha caro, locual sin duda a hala atencion mesora di un ladron cu tabata pasando e ora ey pa “cliente” den e gym.

E victima a raporta cu e susedido tabata entre 7:40am y 9:30am, ora cu e tabata den e establecimiento. “Mi a bay train mainta manera semper. Mi ta un cliente pa basta tempo de eynan y pa mi mala suerte mi a kita mi holoshi den e Treadmill. Ora mi a realisa cu mi a lag’e atras, mi tabata na cas caba. Y ora nos a bay bek niun hende a wak ni sa nada di dje. Gerencia no tin idea di kico ta customer service ni con pa atende un problema asina”, asina e victima a declara na nos awe mainta.

Mas leu e dama, cu awa na wowo a conta nos cu e sa cu el a haci fout di kit’e pasobra e ta un holoshi pisa y dor cu el a core den e mashin, e tabata molesti’e door di su peso. “Pero no ta e manera di approach manera they don’t care y bay cu bo problema otro luga”, asina e cliente a sinti ora cu el a yega na gerencia di e gym pa conta kico a pas’e y cu nan a horta su holoshi di balor.

E caso awor ta den man di Polis, despues cu e cliente a entrega un keho oficial. E ta spera cu via Polis nan lo por yega na imagennan di camara den e gym, pa mira si asina por reconoce e “ladron” cu a bay cu su Rolex durante cu e tabata coriendo riba e mashin. A avisa na “pawnshop” nan pa evita cu hende ta yega cu Rolex pa cambia pa placa.