Pa loke ta Beach Tennis, por a tuma nota cu esaki a mov’e, aunke cu Minister Dangui Oduber tabata pro pa e keda na Eagle Beach, segun cu nan tabata desea.
E ta un atraccion hopi grandi cu ta tuma luga dos siman largo riba Eagle Beach. Awo esaki lo muda. Segun e mandatario, Beach Tennis ta un di e eventonan deportivo mas grandi na Aruba.
E ta un evento cu ta atrae masha hopi turista durante e lunanan di September, October, November. E ta un evento sumamente exitoso, cu ATA tambe ta sponsor pa varios aña. Ta un evento cu e mandatario ta kere aden. E combinacion di deporte y turismo, a bin e discusion cu e organisadornan no a cumpli cu e rekisitonan pa loke ta trata e parti di medio ambiente. Tabata tin diferente reunion entre e minister, e organisacion di Beach Tennis y tambe e minister di Infrastructura.
Den pasado caba a haci palabracionnan cu lo muda e evento for di Eagle Beach pa Bushiri. E mandatario su preferencia lo tabata pa Eagle Beach, door cu e ta wordo considera un di e miho beachnan na mundo. Recientemente esaki a wordo nomina como e di 3 miho beachnan na mundo. Pero tin di compronde for di Minister di Infrastructura cu e organisadornan mes a bay di acuerdo pa move e evento for di Eagle Beach pa Bushiri. Ta tarea e ora di gobierno pa prepara e area di Bushiri, haci’e no solamente accesibel, sino prepara e infrastructura pa por tene un evento asina grandi.
E evento di Beach Tennis, ta un evento cu no solamente ta atrae hopi turista, sino hopi local tambe ta bishita e evento. Ta un evento cu nan ta kere aden. Un decision final ainda no a wordo tuma si e ta bay move pa Bushiri. Pero esey ta e intencionnan cu tin.
Obviamente un decision final mester tuma luga, pa asina e organisadornan tambe tin claridad. Nan tambe mester promove e evento. Si ta muda di Eagle pa Bushiri, pa e ta mesun exitoso pa e ta na Eagle. Na Eagle Beach no tin duda cu e tabata un evento sumamente exitoso. Si mud’e mes pa Bushiri, e deseo ta pa e keda e mesun nivel, e mesun calidad y e mesun exitoso cu e ta na Eagle Beach.
E area
E area ta completamente curu. Gobierno tin plan pa bay drecha e caminda ex-Bushiri Hotel tabata situa. Eynan gobierno y ATA ta bay inverti pa drechamento di esaki. E area caminda cu e evento lo mester tuma luga ta net otro banda di caminda di Crown. Ta completamente curu. Ta rekeri un inversion basta cuantioso pa prepara e beach eynan, pa e por ta cla pa tene un evento asina grandi. Den esey gobierno ta. Si kier prepara esaki pa e ta cla, e lo ta un inversion cuantioso.
Santo ta un di e dilemanan cu tin. Tur e santo cu tabata tin den e ultimo 20 añanan, tabata 300 mil cube, ta cabando. Pa por yena e area cu santo blanco, ta rekeri un inversion pa cumpra santo nobo pa prepar’e pa un evento asina grandi. Esey ta e deliberacionnan cu ta hibando entre ministerio di turismo y ministerio di infrastructura si e fondonan aki ta disponibel pa asina inverti den e santo y prepara localidad aki pa e organisadornan tin’e disponibel pa e evento aki.
Daño na medio ambiente
Segun Minister Oduber, tin un rapport a wordo traha door di DNM y segun tin di compronde for di e conclusionnan di e rapport, cu nan lo a bay cu diferente truck cu no tabata permiti pa bay riba e beach y e trucknan aki a laga yen di azeta atras riba e beach, causando un daño na e medio ambiente y e beach.
Pesey e minister di infrastructura no tabata mucho mas di acuerdo pa haci uzo di e beach aki, mirando cu Eagle Beach ta un prime location y considera como un di e miho beachnan. Pesey a cuminsa cu e proceso di negociacion, hunto cu e organisadornan, pa hunto tuma un decision, si ta mud’e si of no. Si ta mud’e, unda e lo bay wordo acomoda. Ainda Bushiri ta un di e opcionnan. Pero hunto cu ministerio di turismo, infrastructura y e organisador, mester tuma un decision final si e evento lo muda bay Bushiri y con pa yena y prepara e luga aki cu santo y con pa promociona e evento aki.
E preparacion ta den man di DOW, hunto cu minister di Infrastructura. Si e decision wordo tuma cu e evento mester muda, nan ta encarga pa prepara e area aki.
ATA ta patrocina e organisadornan si, pa organisa e evento.
