Siman pasa Garage Cordia Aruba a ricibi bishita di honor na su facilidad. Ta despues di hopi aña cu un di e hefenan maximo di e compania di auto mas bendi na mundo, Toyota, a bishita nos isla. Steve St. Angelo, Chief Executive Officer di Toyota Motors Corporation pa Latino America y Caribe (LACD) a yega Aruba den un tour pa pasa bishita e mercadonan. El a bini for di Sint Maarten y a keda Aruba dos dia largo. E tabata compaña pa su señora.
Na Garage Cordia a prepara algun dia adelanta pa e bishita importante aki. “Ta cu hopi orguyo y honor nos a ricibi e ehecutivo mas halto den nos region. Y mas contento mi ta cu su reaccion riba e mercado di Aruba ta hopi positivo”, asina Danilo Werleman, CEO di Garage Cordia Aruba a duna di conoce. E team di maneho di Garage Cordia a reuni cu e ehecutivo durante dos dia largo, repasando varios punto. A elabora riba e oportunidadnan den nos mercado, e retonan cu ta confrontando y sin lubida e desaroyonan nobo den e mundo di auto mundialmente.
E ehecutivo a bisa na final di a keda hopi impresiona cu e “showroom”, cu henter e facilidad, incluyendo e garashi moderno y e surtido grandi di piesanan cu Garage Cordia so por ofrece. Aruba tabata e ultimo mercado den e tour di paisnan Latino Americano y di Caribe cu a bishita e ultimo simannan, pues e ehecutivo por a compara facilmente e adelantonan y oportunidadnan cu Aruba tin su dilanti.
El a probecha pa anuncia cu na nivel internacional lo haci tur posibel pa Aruba haya mas auto, mas modelo y na tarifanan mas competitivo. Claro cu el a keda hopi contento di e hecho cu Aruba ta canando dilanti den autonan Hybrid y di coriente. E sistema di impuesto reduci pa autonan hybrid y di coriente, sin duda ta un incentivo pa cumpra mas di e tipo di autonan asina na Aruba.
Autonan Hybrid tin un sin fin di beneficio pa e consumidornan, ta hopi mas economico den uzo di combustibel, ta mas economico ora di “service” y mas cu tur cos, ta bon pa medio ambiente. Toyota Motors Corporation como tal a compromete pa manda mas di e tipo di autonan asina pa Aruba, mas modelo y mas auto. Aunke cu tin un demanda grandi pa e categoria di autonan asina den mas mercado, toch e CEO di Toyota Motors Corporation (LACD) ta convenci cu na Aruba tin espacio pa mas crecemento y fortifica e posicion di Toyota den mercado.
Steve St. Angelo di 63 aña di edad, di nacionalidad Mericano, ta e Chief Executive Officer di Toyota Motor Corporation (TMC) pa e region di Latino America y Caribe. El a cuminsa su carera den e industria di auto como un mecanico. El a crece te yega e puesto mas halto den e compania. Separa di CEO di e dos regionnan, e ta Presidente tambe di Toyota Argentina S.A. di Toyota do Brasil LTDA y di Toyota de Venezuela Compania Anonima.
Steve St. Angelo tin un “Bachelor’s degree” den “Computer Engineering” y un “Master Degree” den “Manufacturing Management”. E ta casa, tin yiu y nietonan. E ta biba y tin e oficina principal di Toyota pa region di Latino America na Brazil.
